Ռուհանի. «Այսօր Ամերիկայի Զինուորները Ապահով Չեն, Իսկ Վաղը Եւրոպայի Զինուորները Կրնան Ապահով Չըլլալ»
16 ՅՈՒՆՈՒԱՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Իրանի նախագահ Հասան Ռուհանի յայտնեց, որ իր երկիրը զօր. Քասեմ Սիւլէյմանիի ահաբեկումին պիտի հակադարձէ Միացեալ Նահանգները հեռացնելով շրջանէն եւ այդ ուղղութեամբ պիտի աշխատի, որքան ալ երկար տեւէ:
«Ամերիկեան ուժերը այսօր շրջանին մէջ ապահով չեն, իսկ եւրոպական ուժերը կրնան վաղը ապահով չըլլալ: Օտար ուժերը պէտք է հեռանան Միջին Արեւելքէն», յայտնեց Ռուհանի:
«Արտասահմանի մէջ ոմանք Իրանին վնաս պատճառեցին: Ամերիկան է, որ լարուածութիւնը աճեցուց եւ պատժամիջոցներով ճնշում կը բանեցնէ իրանցի ժողովուրդին վրայ», ըսաւ ան:
«Ամերիկան պատասխանատու է պարտադրուած պատերազմին ու պատժամիջոցներուն մէջ Իրանի դէմ գործուած ոճիրներուն համար», յայտնեց Իրանի նախագահը:
«Սէուտական Արաբիան եւ սիոնական գոյացութիւնը Ամերիկան հիւլէական համաձայնութենէն դուրս գալու դրդեցին, եւ վերջինս վնասեց», ըսաւ Ռուհանի` աւելցնելով. «Շրջանին մէջ սխալեցաք, պատժամիջոցները հաստատելով սխալեցաք եւ սխալեցաք նաեւ, երբ զօր. Սիւլէյմանին ահաբեկեցիք: Այսօր Ամերիկայի զինուորները վտանգուած են, իսկ վաղը` Եւրոպայի զինուորները»:
Յիշեցնենք, որ Բրիտանիան, Ֆրանսան եւ Գերմանիան պաշտօնապէս Իրանը մեղադրեցին իրանեան հիւլէական ծրագիրին վերաբերեալ Գործողութիւններու միացեալ համապարփակ ծրագիրի պայմանները խախտելու յանցանքով, ինչ որ կրնայ դարձեալ յանգեցնել ՄԱԿ-ի պատժամիջոցներու հաստատման, որոնք վերցուած էին համաձայնագիրի կնքման պատճառով:
Իրանի արտաքին գործոց նախարար Մոհամետ Ժաւատ Զարիֆ իր կարգին յայտնեց. «Ամերիկեան ուժերուն Իրաքէն հեռացումը չպահանջեցինք, եւ հիւլէական համաձայնագիրին ապագան կախեալ է Եւրոպայէն»` աւելցնելով. «2015-ին կնքուած հիւլէական համաձայնագիրը լաւագոյն համաձայնագիրներէն մէկն է»:
«Իրաքի մէջ հրթիռային յարձակումի գիշերը զուիցերիացիներուն ճամբով պատգամ մը յղեցինք, թէ տեղի ունեցածը ինքնապաշտպանութիւն է, եւ հետաքրքրուած չենք Միացեալ Նահանգներուն հետ բանակցութիւններով», ըսաւ Զարիֆ:
aztagdaily.com/archives/461065
