Պաղտատի Մէջ Ամերիկեան Ուժերու Երկրէն Հեռացումը Պահանջող Միլիոնաւորներու Ցոյց. «Ամերիկան Բռնագրաւող Պետութիւն Մը Պիտի Նկատուի, Եթէ Մերժէ Իրաքէն Հեռանալ» Կ՛ըսէ Սատըր
25 ՅՈՒՆՈՒԱՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Իրաքեան ընկերութեան տարբեր շերտերուն պատկանող միլիոնաւոր իրաքցիներ երէկ տարբեր նահանգներէ եկան մայրաքաղաք Պաղտատ` ամերիկեան ուժերու երկրէն հեռացումը պահանջող ցոյց կատարելու համար:
Ցուցարարները բարձրացուցած էին իրաքեան դրօշներ եւ պատանքներ հագուած:
Սատըրական հոսանքի ղեկավար սէյիտ Մուքթատա Սատըր երէկ հաղորդագրութիւն մը հրապարակելով յայտնեց. «Ամերիկան բռնագրաւող ու ներխուժող երկիր պիտի նկատուի, եթէ մերժէ Իրաքէն հեռանալ»:
«Եթէ ամերիկեան ուժերը չհեռանան, ապա գոյութիւն ունին այլ քայլեր, ինչպէս` իրաքեան հողերուն վրայ բոլոր ամերիկեան ռազմակայանները փակելը», ըսաւ ան` աւելցնելով. «Մեզ հետաքրքրող միակ բանը Իրաքի գերիշխանութիւնն է, եւ ատիկա կ՛իրագործուի անոր հողերուն վրայ գտնուող բոլոր օտար ուժերուն հեռացումով»:
Սատըր շեշտեց, որ իրաքեան կառավարութիւնը դրացի երկիրներուն հետ պէտք է կնքէ ոտնձգութեան բացառման համաձայնութիւններ, որոնք հիմնուած ըլլան գերիշխանութեան փոխադարձ յարգանքի վրայ, ինչպէս նաեւ բոլոր պաշտօնական ու ոչ պաշտօնական կողմերուն հաղորդակցութիւնները «պետութեան պաշտօնական խողովակներուն եւ նախապէս կնքուած համաձայնութիւններուն միջոցով կատարման վրայ»:
«Քայլերէն մէկն ալ իրաքեան օդային տարածքը բռնագրաւողին զինուորական ու տեղեկահաւաքի օդանաւներուն առջեւ փակելն է եւ ջնջելը բռնագրաւողին հետ բոլոր ապահովական համաձայնութիւններուն` անոնց մէջ միջազգային հաւասարակշռութեան բացակայութեան պատճառով, որովհետեւ կնքուեցան բռնագրաւումի պայմաններուն տակ», ըսաւ շիի ղեկավարը:
Ան ըսաւ, որ Թրամփ Իրաքի վերաբերեալ իր որոշումներուն ու խօսքերուն մէջ մեծամտութիւն պէտք չէ կատարէ, «այլապէս իրեն հետ նոյն ձեւով կը վարուինք»:
www.aztagdaily.com/archives/462309
