Պաղտատի Մէջ Ամերիկեան Դեսպանատան Հրթիռակոծումէն Եւ Վիրաւորներու Արձանագրումէն Ետք. Ուաշինկթըն Պաղտատին Կոչ Կ՛ուղղէ` Յարգելու Դիւանագիտական Ներկայացուցչութիւնները Պաշտպանելու Իր Յանձնառութիւնը
28 ՅՈՒՆՈՒԱՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Կիրակի գիշեր Պաղտատի մէջ Միացեալ Նահանգներու դեսպանատան տարածքին վրայ ինկան երեք հրթիռներ, որոնցմէ մէկը հարուածեց դեսպանատան ճաշարանը: Այս մասին հաղորդեց «Արապիա» պատկերասփիւռի արբանեակային կայանը:
Հրթիռակոծման պատճառով արձանագրուած են քանի մը վիրաւորներ: Դեսպանատան մէջ գտնուող անձերը ուղղաթիռով հեռացուած են դեսպանատունէն:
Իրաքցի բարձրաստիճան պաշտօնատար մը ԱՖՓ լրատու գործակալութեան յայտնեց, որ արձակուած են 5 հրթիռներ, որոնցմէ 3-ը ինկած են դեսպանատան մէջ: Հրթիռներէն մէկը ընթրիքի ժամանակ հարուածած է դեսպանատան ճաշարանը:
Իրաքի խորհրդարանի նախագահ Մոհամետ Խալպուսի յայտարարեց, որ Պաղտատի մէջ ամերիկեան դեսպանատան հրթիռակոծումը վնաս հասցուց երկրի հեղինակութեան ու գերիշխանութեան: Վարչապետի պաշտօնակատար Ատել Ապտել Մեհտին հրամայեց գտնել եւ պատժել մեղաւորները:
Յիշեցնենք, որ 20 յունուարի երեկոյեան դեսպանատան մօտ դարձեալ հրթիռներ ինկած էին, սակայն վիրաւորներ կամ նիւթական վնասներ չէին արձանագրուած:
Միացեալ Նահանգներու արտաքին գործոց նախարարութիւնը հաղորդագրութիւն մը հրապարակելով յայտնեց, որ տեղեակ է Պաղտատի Կանաչ շրջանին մէջ հրթիռներու իյնալուն մասին:
Նախարարութիւնը իրաքեան իշխանութիւններուն կոչ ուղղեց` «յարգելու դիւանագիտական կառոյցները պաշտպանելու իր յանձնառութիւնները»:
«Ապահովական կացութիւնը տակաւին լարուած է, եւ Իրանի աջակցութիւնը վայելող զինեալ խմբաւորումներ տակաւին վտանգ կը ներկայացնեն, ուստի, զգօն կը մնանք», կը նշէ հաղորդագրութիւնը:
Ֆաթհ դաշինքի ղեկավար Հատի Օմարի յայտնեց, որ ամերիկեան դեսպանատան հրթիռակոծման նպատակը «օտար ուժերու հեռացումը արգելակելն է»:
Ասայեպ Ահլ Հաք շարժումի ղեկավարներէն Ժաուատ Թալիպաուի իր կարգին նշեց, որ Դիմադրութեան խմբաւորումները դեսպանատան դէմ յարձակումին ետին չեն կանգնիր:
www.aztagdaily.com/archives/462588
