«Իտլիպի Շարունակուող Ռմբակոծումը Դիտողի Կարգավիճակին Մէջ Պիտի Չմնանք» Կ՛ըսէ Էրտողան
01 ՓԵՏՐՈՒԱՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ: ««Դ Ի Մ Ո Ւ Մ ՄԱԿ-ին Արեւմտյան Հայաստանի եւ Կիլիկիայի տարածքների ապառազմականացման, այնտեղից Թուրքիայի Հանրապետության բռնազավթիչ ուժերը դուրս բերելու վերաբերյալ»»
Թուրքիոյ նախագահ Ռեճեփ Թայիփ Էրտողան շեշտեց. «Երուսաղէմը մեզի համար կարմիր գիծ է, եւ Աքսայի մզկիթին երկարող որեւէ ձեռք պիտի կոտրենք»:
«Պիտի չընդունինք Միացեալ Նահանգներու նախագահ Տանըլտ Թրամփի ծրագիրը պաղեստինցիներուն պարտադրելը, որովհետեւ Երուսաղէմը կարմիր գիծ է, եւ Աքսայի մզկիթին երկարող որեւէ ձեռք պիտի կտրենք», յայտնեց Էրտողան` աւելցնելով. «Չենք ճանչնար եւ չենք ընդունիր այս ծրագիրը, որ ամբողջովին կը քանդէ Պաղեստինը եւ կը բռնագրաւէ Երուսաղէմը»:
«Կարելի չէ ընդունիլ ամերիկեան նոր ծրագիրը, եւ կարգ մը արաբական երկիրներու կողմէ զայն ընդունիլը դաւաճանութիւն է», ըսաւ Թուրքիոյ նախագահը` նշելով. «Թուրքիան միշտ պաղեստինեան դատին եւ պաղեստինցի ժողովուրդին կողքին պիտի ըլլայ»:
«Իսրայէլ ահաբեկչական պետութիւն է եւ մեր մօտ որեւէ համարում չունի», նշեց ան:
Անդրադառնալով Սուրիոյ հարցին` Թուրքիոյ նախագահը նշեց. «Սուրիոյ նախագահ Պաշշար Ասատի վարչակարգը կը շարունակէ Սուրիոյ մէջ արիւն հեղել»:
«Ռուսիոյ հետ Իտլիպի վերաբերեալ մեր գոյացուցած համաձայնութեան խախտում տեղի ունեցաւ, եւ մենք Իտլիպի շարունակ ռմբակոծումը դիտողի կարգավիճակին մէջ պիտի չմնանք», յայտարարեց Էրտողան:
«Թերեւս զինուորական նոր գործողութեան դիմենք, եթէ Իտլիպի մէջ կացութիւնը շուտով չլուծուի», ընդգծեց Թուրքիոյ նախագահը:
Քրեմլին Էրտողանի յայտարարութեան պատասխանելով նշեց Ռուսիան ամբողջովին կը յարգէ Իտլիպի մէջ իր յանձնառութիւնները, սակայն մեծապէս մտահոգ է շրջանին մէջ զինեալներուն յարձակումներով»:
Ինչ կը վերաբերի Լիպիոյ, Էրտողան ըսաւ. «Ձեռնածալ մնալով պիտի չդիտենք այն ուժերը, որոնք Սարաժի կառավարութեան դէմ յեղաշրջում կը կատարեն»:
«Պիտի չընդունինք քննադատութիւնները, որոնք Լիպիոյ մէջ յեղաշրջումին ու ահաբեկիչներուն կը զօրակցին», աւելցուց ան` նշելով. «Մինչեւ որ Լիպիոյ մէջ խաղաղութիւն եւ կայունութիւն հաստատուի, այդտեղ պիտի մնանք»:
www.aztagdaily.com/archives/463206
