Հայաստան Ստացած է Կորոնավարակի Ախտորոշման Տարրալուծական Փորձարկիչներ
03 ՓԵՏՐՈՒԱՐ 2020 – ԷՐԿԻՐ – ՀԱՅԱՍՏԱՆ:
Հայաստան ստացած է կորոնավարակի ախտորոշման տարրալուծարանային փորձարկիչներ: Այս մասին ֆէյսպուքի իր էջին վրայ գրած է ՀՀ առողջապահութեան նախարար Արսէն Թորոսեան:
«Քիչ առաջ ստացանք կորոնավարակի ախտորոշման տարրալուծական փորձարկիչները: Անոնք շատ կարեւոր են հիւանդութեան կանխարգիլման եւ բուժման համար: Մինչ օրս հիւանդութեան բնորոշ ախտանիշներով հիւանդներ չենք ունեցած, սակայն այսուհետեւ պիտի կարենանք կասկածելի պարագաներուն նաեւ տարրալուծական ստուգում ընել: Մնացած բոլոր հակահամաճարակային աշխատանքները պատշաճ կ՛իրականացուին»,-նշած է Արսէն Թորոսեան:
Նոր տեսակի կորոնավարակով հիւանդներուն թիւը աշխարհի մէջ կ՛անցնի 14 հազարը: Մահացած է աւելի քան 300 մարդ: Մահուան առաջին դէպքը տեղի ուենցած է Չինաստանէն դուրս` Ֆիլիփիններու մէջ: Մահացածը չինական Ուհան նահանգնէն էր, որ կը համարուի վարակի կեդրոնին:
Հայաստան բերուած է 200 փորձարկիչ, որ տրամադրուած է Ռուսական կողմէն’ անվճար:
yerakouyn.com/2020/02/03/հայաստան-ստացած-է-կորոնավարակի-ախտոր/
