ՀՀ Սփիւռքի Հարցերով Գլխաւոր Յանձնակատարը Թիֆլիսի Սուրբ Գէորգ Առաջնորդանիստ Եկեղեցի Այցելեց
03 ՓԵՏՐՈՒԱՐ 2020 – ԷՐԿԻՐ – ՀԱՅԱՍՏԱՆ – ՍՓԻՒՌՔ:
Փետրուար 1-ին, աշխատանքային այցով Թիֆլիս գտնուող ՀՀ Սփիւռքի հարցերով գլխաւոր յանձնակատար Զարեհ Սինանեան եւ գրասենեակի համահայկական ծրագրերու վարչութեան գիտակրթական ծրագրերու բաժնի պետ Հայկ Ենգիբարեան, Վրաստանի մէջ ՀՀ արտակարգ եւ լիազօր դեսպան Ռուբէն Սադոյեանի առաջնորդութեամբ եւ դեսպանութեան դիւանագէտներու ուղեկցութեամբ, այցելեցին Վիրահայոց թեմի Թիֆլիսի Սուրբ Գէորգ առաջնորդանիստ եկեղեցի: Այս մասին կը հաղորդէ armenianchurch.ge-ն։
Հիւրերը իր նստավայրին մէջ ընդունեց Վիրահայոց թեմի առաջնորդական տեղապահ հոգեշնորհ Տէր Կիրակոս վարդապետ Դաւթեան: Կայացած զրոյցին ընթացքին՝ Հայր Սուրբը հիւրերուն պատմեց թեմի գործունէութեան, պատմա-մշակութային կոթողներու պահպանութեան, վիրահայութիւնը Հայ Առաքելական Եկեղեցւոյ շուրջ համախմբելու մասին, կարեւոր համարեց ազգային մշակոյթի զարգացման, մայրենիի տարածման ուղղուած թեմին ծաւալած աշխատանքները:
Գլխաւոր յանձնակատարը եւ հիւրերը շրջայց կատարեցին 13-րդ դարու պատմական կոթող Սուրբ Գէորգ առաջնորդանիստ եկեղեցւոյ մէջ, իրենց հիացմունքը արտայայտեցին եկեղեցւոյ գեղեցկութեան, Հովնաթանեաններու տաղանդաւոր ձեռքով կատարուած անկրկնելի որմնանկարներուն կապակցութեամբ: Հինաւուրց եւ զօրաւոր տաճարին մէջ մոմեր վառելէ եւ աղօթք բարձրացնելէ ետք՝ հիւրերը ուղղուեցան դէպի թեմի «Յովհաննէս Թումանեանի տուն» գիտամշակութային կեդրոն:
Այստեղ անոնց դիմաւորեցին կեդրոնի հոգեւոր տեսուչ արժանապատիւ Տէր Կիրակոս քահանայ Սիմոնեանը եւ կեդրոնի աշխատակիցները: «Թումանեանի տուն» գիտամշակութային կեդրոնի ղեկավար Գիսէ Յովսէփեան հիւրերուն ներկայացուց Ամենայն հայոց բանաստեղծին անունը կրող կեդրոնի առօրեան, որ դարձած է մայր հայրենիքէն եւ այլ երկիրներէ ժամանած հիւրերու այցելութեան գլխաւոր տեղը, նաեւ խօսեցաւ կեդրոնի գործունէութեան նպատակներուն եւ ուղղութիւններուն մասին: Կեդրոնի ղեկավարը գլխաւոր յանձնակատար Սինանեանին ներկայացուց Թումանեանի 150-ամեակին նուիրուած այն ձեռնարկները, որոնք իրականացուած են եւ արձանագրուած են տան պատմութեան էջերուն մէջ, ցուցադրեց հրատարակուած գիրքերը, կտոր-կտոր հաւաքուած եւ սուրբ մասունք դարձած Ամենայն հայոց բանաստեղծի հետ կապուած իրերը եւ նուէրները:
Յովհաննէս Թումանեանի հասարակական գործունէութեան եւ ընտանիքին մասին ներկաներուն պատմեց կեդրոնի աշխատակցուհի Գոհար Մազմանեանը:
ՀՀ Սփիւռքի հարցերով գլխաւոր յանձնակատար Զարեհ Սինանեան գրութիւն կատարեց կեդրոնի տպաւորութիւններու գիրքին մէջ:
Հիւրերը մասնակցեցան ժողովրդական մեծ բանաստեղծի տան ընդունուած թէյախմութեան աւանդոյթին:
Աղբյուր` armenianchurch.ge
yerakouyn.com/2020/02/03/հհ-սփիւռքի-հարցերով-գլխաւոր-յանձնակա/
