Մինչ Էրտողան Իտլիպի Մէջ «Մօտալուտ» Թրքական Գործողութեամբ Մը Կը Սպառնայ. Քրեմլին Կը Զգուշացնէ Թուրքիան Սուրիոյ Բանակին Դէմ Որեւէ Յարձակում Գործելէ
20 ՓԵՏՐՈՒԱՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
««Թուրքիան թաքցնում է Օսմանյան դարաշրջանի Հայոց ցեղասպանության փաստերը. Պատմաբան Թանար Աքչամ»»
Թուրքիոյ նախագահ Ռեճեփ Թայիփ Էրտողան երէկ սպառնաց Իտլիպի մէջ «մօտալուտ» զինուորական գործողութիւն մը շղթայազերծել:
Ան Անգարայի մէջ իր արտասանած խօսքին մէջ Սուրիոյ կառավարութեան դարձեալ կոչ ուղղեց` իր ուժերը մինչեւ փետրուարի վերջը հեռացնելու Իտլիպի մէջ կարգ մը դիրքերէ` նշելով. «Ասիկա մեր վերջին զգուշացումն է: Իտլիպի մէջ գործողութեան շղթայազերծումը մօտալուտ դարձաւ»:
«Մոսկուայի հետ Իտլիպի շուրջ բանակցութիւններուն մէջ բաղձալի արդիւնքներու չհասանք, եւ բանակցութիւնները Թուրքիոյ պահանջները բաւարարելէ հեռու են», յայտնեց Էրտողան:
Քրեմլին, սակայն, զգուշացուց Անգարան Սուրիոյ բանակի դէմ որեւէ յարձակում գործելէ` նշելով. «Թրքական ուժերուն Սուրիոյ բանակին դէմ զինուորական գործողութիւն սկսելու հաւանականութիւնը յոռեգոյն բեմագրութիւնն է»:
«Սուրիոյ բանակին ու Սուրիոյ մէջ մեր զինուորական կառոյցներուն դէմ յարձակումներուն պատճառով Սոչիի համաձայնութեան գործադրումէն գոհ չենք», նշեց Քրեմլին` աւելցնելով. «Մոսկուա մտադիր է շարունակել Անգարայի հետ հաղորդակցութիւնները` Իտլիպի մէջ կացութեան վատթարացումը կանխարգիլելու համար»:
«Իտլիպի մէջ ահաբեկչական խմբաւորումներուն դէմ գործողութիւնը անշուշտ, որ համահունչ է Սոչիի համաձայնութիւններուն», աւելցուց Քրեմլինը:
Ռուսիոյ արտաքին գործոց նախարար Սերկէյ Լաւրով իր կարգին յայտնեց. «Սուրիոյ բանակը կը հակադարձէ ահաբեկիչներուն սադրանքներուն, եւ մենք կը զօրակցինք այդ վերաբերմունքին»:
«Սուրիոյ բանակին գործողութիւնները պարզապէս Իտլիպի մէջ համաձայնութիւններուն խախտումին հակադարձութիւն մըն են», աւելցուց ռուսական դիւանագիտութեան պետը:
Նշենք, որ Թուրքիոյ պաշտպանութեան նախարար Հուլուսի Աքար երէկ յայտնեց, որ Թուրքիա պիտի շարունակէ Ռուսիոյ հետ բանակցութիւնները, սակայն նշեց. «Սուրիոյ մէջ թրքական հսկողութեան կէտերու վայրերու փոփոխութիւնը բացառուած է»:
Ռուսիոյ արտաքին գործոց փոխնախարար Միխայիլ Պոկտանով աւելի ուշ հաւանական նկատեց, որ մարտի սկիզբը Թեհրանի մէջ գումարուի Ռուսիա – Իրան – Թուրքիա վեհաժողով մը` «եթէ Անգարան համաձայն գտնուի»:
www.aztagdaily.com/archives/465425
