09 ՀՈԿՏԵՄԲԵՐ 2015
Թուրքիոյ վարչապետ Ահմեթ Տաւութօղլու յայտարարեց. «Թրքական կառավարութիւնը Ռուսիոյ դէմ շարք մը հաւանական միջոցառումներ քննարկեց եւ պատրաստ է անհրաժեշտութեան պարագային Ռուսիոյ դէմ պատժամիջոցներ հաստատելու»:
«Մենք պատրաստ ենք Ռուսիոյ հետ երկխօսութեան, սակայն առանց նախապայմաններու», ըսաւ ան` աւելցնելով. «Կրնանք ուժանիւթի այլընտրանքներ գտնել մեր կարիքները բաւարարելու համար, եթէ Ռուսիան դադրի զայն մեզի մատակարարելէ»:
Թուրքիոյ վարչապետը նաեւ զգուշացուց Իրանը` յայտնելով. «Եթէ Իրանի մէջ Թուրքիոյ նկատմամբ թշնամանքը շարունակուի, ապա ատիկա մեծ վնաս պիտի պատճառէ երկկողմանի յարաբերութիւններուն»:
Տաւութօղլու փափաք յայտնեց մօտ օրէն Իրաք այցելելու` նշելով. «Իրաքի մէջ թրքական ուժերուն ներկայութեան նպատակը ՏԱՀԵՇ-ի դէմ պայքարին մէջ ներդրում ունենալն է»:
Թուրքիոյ արտաքին գործոց նախարարութիւնը իր կարգին յայտարարեց, որ Թուրքիան պիտի դադրեցնէ Իրաքի մէջ յաւելեալ ուժերու տեղակայումը, սակայն ներկայիս Իրաքի մէջ գտնուող իր ուժերը պիտի չհեռացնէ:
Իրաքի կառավարութիւնը այս հարցով երէկ յայտարարեց. «Ազգային գերիշխանութիւնն ու երկրին աշխարհագրական սահմանները կարմիր գիծեր են, որոնց շրջանցումը արտօնելի չէ»` աւելցնելով. «Չկայ ստորագրուած համաձայնութիւն մը, որ դրացի Թուրքիոյ կ՛արտօնէ մեր երկրին սահմանը որեւէ պատրուակի տակ հատելու»:
Իրաքի կառավարութիւնը նշեց. «Թրքական զօրաբաժիններու (Իրաք) մուտքը մերժելի եւ դատապարտելի է, եւ Անգարայէն կը պահանջենք իր ուժերը հեռացնել»:
Ռուսիոյ արտաքին գործոց նախարարութիւնը իր կարգին առանց Պաղտատի արտօնութեան թրքական ուժերու հիւսիսային Իրաքի մէջ ներկայութիւնը նկատեց «ապօրինի»: Նախարարութիւնը նաեւ նշեց, որ ՏԱՀԵՇ-ի դէմ պայքարի միջազգային դաշինքին կողմէ սուրիական բանակի դիրքերուն ռմբակոծումը «ՏԱՀԵՇ ահաբեկչական խմբաւորման դէմ պատերազմին մէջ կացութեան վատթարացման ցուցանիշն է»: Սակայն ամերիկացի զինուորական պաշտօնատար մը «Ռոյթըրզ» լրատու գործակալութեան յայտնեց, որ Միացեալ Նահանգներ վստահ են, որ Սուրիոյ բանակին դէմ կատարուած յարձակումին պատասխանատուն Ռուսիան է:
Միւս կողմէ, Իրանի կառավարութեան բանբեր Մոհամետ Պաքեր Նոպախթ յայտնեց, որ Թուրքիոյ նախագահ Ռեճեփ Թայիփ Էրտողանի այն պնդումը, թէ հեռաձայնային հաղորդակցութեան մը ընթացքին սպառնացած եւ զգուշացուցած է Իրանի նախագահ Հասան Ռուհանիին, «բացարձակ սուտ մըն է», իսկ երկու նախագահներուն միջեւ հեռաձայնային հաղորդակցութիւնը ամբողջութեամբ ձայնագրուած է:
ԱԶԴԱԿ
http://www.aztagdaily.com
