10 ԴԵԿՏԵՄԲԵՐ 2015
ԼՂՀ նախագահ Բակօ Սահակեան Դեկտեմբեր 10-ին շնորհաւորական ուղերձ յղած է ԼՂՀ պետական անկախութեան մասին հանրաքուէի եւ Սահմանադրութեան օրուան առիթով:
Արցախի Հանրապետութեան նախագահի աշխատակազմի տեղեկատւութեան գլխաւոր վարչութեան փոխանցած տեղեկութիւններով՝ ուղերձին մէջ ըսուած է.
«Սիրելի՛ արցախցիներ,
Հանրապետութեան իշխանութիւնների եւ անձամբ իմ անունից ի սրտէ շնորհաւորում եմ ձեզ ԼՂՀ պետական անկախութեան մասին հանրաքուէի եւ Սահմանադրութեան օրուայ առթիւ: Այս տօնը յատկապէս կարեւոր է մեր ժողովրդի համար, քանի որ խորհրդանշում է ազատ ու անկախ, ժողովրդավարական ու իրաւական պետութիւն կառուցելու նրա ձգտումը, պետութիւն, որտեղ գերակայ է օրէնքը, որտեղ պաշտպանուած են մարդու իրաւունքներն ու ազատութիւնները, քաղաքացիների եւ պետութեան օրինական շահերն ու անվտանգութիւնը:
1991 թուականին անկախութիւն հռչակած Արցախն անցել է պարտադրուած պատերազմի միջով, յաղթահարել է բազում դժուարութիւններ ու փորձութիւներ, բայց եւ ունեցել փառաւոր յաղթանակներ ու նուաճումներ:
Անկախ պետութեան կայացման ճանապարհին կարեւոր ձեռքբերում էր մեր երկրի մայր օրէնքի` Սահմանադրութեան ընդունումը: 2006 թուականի հանրաքուէն դարձաւ եւս մէկ վկայութիւնն այն բանի, որ մեր ժողովրդի ընտրած ուղին ճիշտ է ու հաստատուն, եւ որ ոչ ոք ու ոչ մի բան չեն կարող կասեցնել նրա ընթացքը: Դա պէտք է քաջ գիտակցի նաեւ մեր հակառակորդը, ով պահ անգամ չի վարանում դիմելու սադրիչ գործողութիւնների:
Հայաստանի եւ Սփիւռքի մեր քոյրերի ու եղբայրների հետ ձեռք ձեռքի մենք այսուհետ էլ անելու ենք ամէն ինչ Արցախի պետականութեան շարունակական ամրապնդման, մեր ժողովրդի անվտանգութեան ու բարեկեցութեան ապահովման, պաշպանունակութեան մակարդակի բարձրացման, տնտեսութեան զարգացման, մարդկանց կենսապայմանների բարելաւման ուղղութեամբ: Արցախը պէտք է դառնա զարգացած ու ժամանակակից հանրապետութիւն եւ իր արժանի տեղը զբաղեցնի միջազգային հանրութեան շարքում:
Թանկագին հայրենակիցներ,
Մէկ անգամ եւս շնորհաւորում եմ բոլորիդ այս յիշարժան տօնի առթիւ եւ մաղթում խաղաղութիւն, քաջառողջութիւն ու ամենայն բարիք»:
ԵՌԱԳՈՅՆ
www.yerakouyn.com
