Էրտողան Յունաստանին Կոչ Կ՛ուղղէ` Գաղթականներուն Առջեւ «Իր Դռները Բանալու»
09 ՄԱՐՏ 2020 – ԱՆԴՐԱԴԱՐՁ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Թուրքիոյ նախագահ Ռեճեփ Թայիփ Էրտողան Յունաստանին կոչ ուղղեց` «դռները բանալու» Թուրքիայէն Յունաստանի ճամբով Եւրոպա ուղղուող գաղթականներուն առջեւ` զարմանք յայտնելով, որ ոչ ոք ձայն բարձրացուցած է «ապաստան խնդրողներուն հետ յունական իշխանութիւններուն ոչ մարդկային վարմունքը դատապարտելու»:
Ան յայտարարեց, որ այսօր հանդիպում պիտի ունենայ Եւրոպական Միութեան պաշտօնատարներուն հետ` քննարկելու համար գաղթականներու հարցը:
Էրտողան մաղթեց, որ «Պելճիքայի մէջ ապաստան խնդրողներու տագնապին շուրջ Եւրոպական Միութեան պաշտօնատարներուն հետ ժողովին մէջ այլ արդիւնքի» հասնի:
Թուրքիոյ նախագահը մէկ օր առաջ թրքական եզերապահ ուժերուն հրամայեց արգելք հանդիսանալ գաղթականներուն Թուրքիայէն Եգէական ծովը կտրելուն:
Եւրոպական Միութեան արտաքին քաղաքականութեան բարձրագոյն յանձնակատար Ճոզեփ Պորել դարձեալ մերժեց Թուրքիոյ կողմէ գաղթականները եւրոպացիներուն դէմ իբրեւ շանթաժի խաղաքարտ օգտագործելը:
Ան աւելցուց, որ Սուրիոյ մէջ թռիչքներու արգիլեալ գօտիի հաստատումը Եւրոպական Միութեան կարողութենէն վեր է: «Կ՛ուզենք շարժիլ մեր կարելիութիւններուն եւ ներուժին համաձայն, եւ կարողութիւնը չունինք Սուրիոյ մէջ թռիչքներու արգիլեալ գօտի հաստատելու», նշեց ան:
Յունաստանի վարչապետ Քիրիաքոս Միցոթաքիս իր կարգին յայտնեց, որ Եւրոպական Միութեան եւ Թուրքիոյ միջեւ գաղթականներու տագնապին շուրջ գոյացած համաձայնութիւնը մեռած է:
Մարդկային իրաւանց սուրիական դիտարանի տնօրէն Ռամի Ապտելռահման յայտնեց. «Թրքական սահմանապահ ուժերը Էրտողանի` գաղթականներուն դէպի Եւրոպա հոսքը արգիլել խոստանալէն ի վեր սպաննած են 448 քաղաքացիներ, ներառեալ` 80 երեխաներ:
www.aztagdaily.com/archives/467723
