Իրաքի Նախագահութիւնը Կը Դատապարտէ Իրաքեան Բանակին Ու Աշխարհազօրին Վրայ Ամերիկեան Յարձակումը
14 ՄԱՐՏ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Իրաքի նախագահական պալատը դատապարտեց իրաքեան բանակին ու աշխարհազօրի դիրքերուն վրայ ամերիկեան յարձակումը` զայն նկատելով «ազգային գերիշխանութեան ոտնահարում»:
Նախագահութիւնը պահանջեց, որ հարցերու լուծումը ըլլայ «կառավարութեան աջակցելով, որպէսզի իր պարտաւորութիւնը կատարէ»:
«Այն շարունակուող ոտնահարումները, որոնց պետութիւնը կ՛ենթարկուի, իր կարողութեան ու վարկին ծրագրուած ու վտանգաւոր տկարացում մըն է», նշուած է Իրաքի նախագահական պալատին հրապարակած հաղորդագրութեան մէջ:
Ամերիկեան ռմբաձիգներ երէկ յարձակումներ գործեցին Ժարաֆ Սախըրի, Սալահէտտինի, Պուքամալ շրջանի Հարիի, Քարպալայի միջազգային օդակայանին եւ այդ վայրերուն մէջ գտնուող դիրքերու վրայ:
Միացեալ Նահանգներու պաշտպանութեան նախարարութիւնը յայտարարեց, որ յարձակումները թիրախ դարձուցած են Իրաքի Հըզպալլայի ջոկատներ խմբաւորումը:
Ըստ Փենթակոնի հրապարակած հաղորդագրութեան, յարձակումի ենթարկուած վայրերը կը պարունակեն զէնքեր, որոնք կ՛օգտագործուին ամերիկեան ուժերու եւ Միջազգային դաշինքի ուժերուն դէմ յարձակումներու համար:
«Յարձակումները պաշտպանողական բնոյթի էին ու պատշաճ, եւ ուղղակի հակազդեցութիւն էին այն սպառնալիքին, զոր Իրանի աջակցութիւնը վայելող միլիսները կը ներկայացնեն», յայտնեց Փենթակոն:
Ամերիկեան յարձակումին պատճառով իրաքցի 5 զինուորներ եւ քաղաքային մը զոհուեցան:
www.aztagdaily.com/archives/468530
