Յ. ԼԱՏՈՅԵԱՆ – Տեսէ՛ք Եւ Մտածեցէ՛ք – Քորոնա» ժահրի համաշխարհային աղէտ նկատուիլն ու ամբողջ աշխարհը զօրաշարժի ենթարկելով հակաքորոնա միջոցառման կիրարկումը մենք տեսանք
31 ՄԱՐՏ 2020 – ՊՍԱԿԱՁԵՒ ԺԱՀՐ – ՊՍԱԿԱՁԵՒ ՎԱՐԱԿ:
Յ. ԼԱՏՈՅԵԱՆ
Տեսէ՛ք:
«Քորոնա» ժահրի համաշխարհային աղէտ նկատուիլն ու ամբողջ աշխարհը զօրաշարժի ենթարկելով հակաքորոնա միջոցառման կիրարկումը մենք տեսանք: Շատ յստակ տեսանք, որ ինչպէ՛ս տարբեր երկիրներու ղեկավարներ իրերայաջորդ հակասական ելոյթներով, խուճապով, անկարողութեամբ, մտքի, խելքի եւ կազմակերպական թափթփածութեամբ հանդէս եկան:
Տեսէ՛ք մեծ պետութիւններու ղեկավարներուն անփառունակ եւ անհեռատես պահուածքը:
Չէ՞ որ աշխարհի ամենահզօր պետութիւնն էր Միացեալ Նահանգները: Չէ՞ որ եւրոպական բժշկական համակարգը ամէնէն վստահելին եւ կատարելագործուածն էր:
Չէ՞ որ Ռուսիան զինուժով, մարտական եւ գաղտնի սպասարկութեամբ ամէնէն անխոցելի համակարգը ունէր:
Չէ՞ որ Սէուտական Արաբիան եւ Արաբական Ծոցը նիւթապէս շատ հզօր էին:
Այո՛, այս բոլորը ցոյց կու տան, որ այս երկիրներու ղեկավարները խաղաղ պայմաններու մէջ խաղացող անհեռատես ղեկավարներ էին:
Ճգնաժամի պահուն բոլորին ալ մտքի, խելքի եւ ելոյթներու անփառունակութիւնը տեսանք:
Մտածեցէ՛ք:
Ճգնաժամի օրերուն Հռոմի պապէն մինչեւ գիւղի եկեղեցւոյ քահանան կոչ կ՛ուղղեն, որ մտածենք մեր ըրածներուն մասին եւ բոլոր թշնամանքի ու ատելութեան օրակարգերը մէկդի դնենք:
Ճիշդ է, պէտք է մտածենք, որ բոլորս ալ նոյն նաւուն մէջն ենք, եւ նաւը վտանգուած է:
Մտածեցէ՛ք, որ մեր ազգային հասարակական, կուսակցական, կրօնական, ընկերային, ընտանեկան, աշխատանքի եւ այլ մարզերու մէջ մեր բոլոր քէնութիւնները, անհանդուրժողութիւնները, ատելութիւններն ու բամբասանքները մէկդի դնելու զանգը հնչած է:
Նոր էջ բանալու, նորը սկսելու, սրտերը մաքրելու եւ ձեռք-ձեռքի տալու` դժուարութիւնները դիմագրաւելու պահը եկած է:
Մտածեցէ՛ք:
yerakouyn.com/2020/03/31/տեսէ՛ք-եւ-մտածեցէ՛ք/
