Ռուսիան Պատրաստ Է Ազրպէյճանի Հետ Բանակցիլ Զինուորական Օդանաւերու Մատակարարման Շուրջ
10 ԱՊՐԻԼ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ռուսիան պատրաստ է Ազրպէյճանի հետ բանակցութիւններու` զինատեսակներու լայն տեսականի, ներառեալ պատերազմական օդանաւերու, մատակարարման շուրջ: «Ինթերֆաքս» կը հաղորդէ, որ այս մասին կը յայտնեն Ռուսիոյ Զինուորական ճարտարագիտութեան համագործակցութեան դաշնակցային ծառայութենէն:
Ծառայութեան բանբեր Մարիմ Վորոպեւան յայտարարած է, որ զինուորական-թեքնիք համագործակցութեան ոլորտին մէջ Ազրպէյճան կը նկատուի Ռուսիոյ գործընկերը, այդ իսկ պատճառով Մոսկուան պատրաստ է Պաքուին հետ բանակցութիւններու` ռուսական սպառազինութեան եւ զինուորական սարքերու մատակարարման համար:
Ազրպէյճանի պաշտպանութեան նախարարութիւնը վերջերս յայտարարած է ռուսական «Միկ-35» եւ «Սու-35» հալածիչներու նկատմամբ հետաքրքրութեան մասին:
Նախարարութեան ներկայացուցիչները արդէն այցելած են «Սուխոյ» կազմակերպութեան եւ «Միկ»-ի արտադրամասեր:
Ազրպէյճանի նախագահ Իլհամ Ալիեւ 2019-ին յայտարարած էր ռազմաթեքնիքական ոլորտի մէջ Ռուսիոյ հետ հինգ միլիառ տոլարի պայմանագիր կնքելու մասին, որմէ երեք միլիառը արդէն իրականացուած է:
www.aztagdaily.com/archives/470513
