Նախագահ Մաքրոնի նամակը՝ Հայաստանի նախագահին. Ֆրանսան յանձնառու է պայքարելու ժխտողականութեան դէմ
25/04/2020 – ՖՐԱՆՍԱ – ՀԱՅԱՍՏԱՆ: (Նոր Յառաջ)
25/04/2020 – ՖՐԱՆՍԱ – ՀԱՅԱՍՏԱՆ: (ՀԱՅՈՑ ՑԵՂԱՍՊԱՆՈՒԹԻՒՆ – ԿԸ ՅԻՇԵՄ ԵՒ ԿԸ ՊԱՀԱՆՋԵՄ – ARMENIAN GENOCIDE – I REMEMBER AND I DEMAND – GÉNOCIDE ARMÉNIEN – JE ME SOUVIENS ET J’EXIGE)
Ֆրանսայի Հանրապետութեան նախագահ Էմանիւէլ Մաքրոն Հայոց ցեղասպանութեան 105-ամեակին առիթով նամակ մը յղած է Հայաստանի Հանրապետութեան նախագահ Արմէն Սարգսեանին, ուր մասնաւորաբար նշուած է.
«Պարո՛ն նախագահ,
Սիրելի՛ բարեկամ,
Հայոց ցեղասպանութեան 105-ամեակի յիշատակի այս օրը Ձեզի, ինչպէս նաև հայ ժողովուրդին կը յղեմ իմ լաւագույն եղբայրական և բարեկամական ողջոյնները:
Ապրիլ 24-ին Ֆրանսան կը յիշէ Կոստանդնուպոլսոյ 600 հայ մտաւորականներուն սպանդը, որ սկիզբ դրաւ Ցեղասպանութեան: Այսօր Ֆրանսա առաւել քան երբեք յանձնառու է պաշտպանելու զոհերուն յիշատակը, պայքարելու ժխտողականութեան դէմ և լուրջ դասեր քաղելու այդ ողբերգական պատմութեան էջէն:
Անցեալ տարի իմ երկիրը, համաձայն իմ ստանձնած յանձնառութեան՝ Ապրիլ 24-ը յայտարարեց Հայոց ցեղասպանութեան յիշատակի օր: Խստօրէն յարգելով ներկայ առողջապահական վիճակին թելադրած հրահանգները՝ ես որոշեցի, որ այս տարի նոյնպէս այդ օրը պէտք է նշուի՝ Փարիզի մէջ, սեղմ արարողութեամբ, Ֆրանսայի կառավարութեան անդամներու ներկայութեան:
Այդ ժառանգութիւնը և հասարակաց յիշողութիւնը մեր երկու երկրներուն միջև իւրայատուկ յարաբերութեան հիմք կը հանդիսանայ: Այսօր աշխարհը պատուհասած պսակաձեւ ժահրի համաճարակը բոլորիս կը պարտադրէ առողջապահական, տնտեսական և ընկերային նոր մարտահրաւէրներ: Այդ մարտահրաւէրները մենք պիտի դիմագրաւենք միասին։ Եւ ես համոզուած եմ, որ Ֆրանսա և Հայաստան միասնաբար պիտի գործեն միջազգային շրջանակներու մէջ՝ ի նպաստ աւելի՛ արդիւնաւէտ, բազմակողմանի և նորահաստատ համերաշխութեան:
Ինչ ալ ըլլան դժուարութիւնները, Հայերը կրնան յոյս դնել Ֆրանսայի բարեկամութեան վրայ: Հաւատարիմ իր յանձնառութիւններուն՝ Ֆրանսան Հայութեան կողքին է, թիկունք հանդիսանալով խաղաղութեան և բարգաւաճման հասնելու անոր իղձերուն:
Պարո՛ն նախագահ, ընդունեցէք յարգանքներուս խորին հաւաստիքը»:
Նոր Յառաջ)
www.norharatch.com/
