«Չինաստան Կարելի Ամէն Բան Պիտի Ընէ, Որպէսզի Նախագահական Ընտրութեան Մէջ Պարտուիմ» Կ՛ըսէ Թրամփ
02 ՄԱՅԻՍ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ՀԱՅՈՑ ՑԵՂԱՍՊԱՆՈՒԹԻՒՆ – ԿԸ ՅԻՇԵՄ ԵՒ ԿԸ ՊԱՀԱՆՋԵՄ:
Միացեալ Նահանգներու նախագահ Տանըլտ Թրամփ յայտարարած է, թէ իր կարծիքով, «Քորոնա» ժահրին նկատմամբ Չինաստանի վերաբերմունքը ապացոյցն է այն բանին, որ Փեքին ամէն ինչ պիտի ընէ նոյեմբերին նախատեսուած նախագահական ընտրութեան մէջ իր պարտութեան համար:
Սպիտակ տան ղեկավարը «Ռոյթըրզ» լրատու գործակալութեան հետ հարցազրոյցի ընթացքին շատ կարծր արտայայտուած է Չինաստանի մասին եւ նշած, որ տարբերակներ կը մտածէ Չինաստանը «Քորոնա» ժահրի նկատմամբ անոր վերաբերմունքին համար պատասխանատուութեան ենթարկելու շուրջ:
«Ես շատ բան կրնամ ընել», ըսած է Թրամփ:
Միացեալ Նահանգներու նախագահը «Քորոնա» ժահրի համաճարակի մեղքը կը բարդէ Չինաստանի վրայ: Վարակը Միացեալ Նահանգներու մէջ պատճառ դարձած է աւելի քան 60 հազար մահուան եւ երկրին տնտեսութիւնը մատնած է խոր ճգնաժամի` միեւնոյն ժամանակ սպառնալով Թրամփի նախագահ վերընտրուելու առիթներուն:
Հանրապետական նախագահը, որուն յաճախ կը մեղադրեն, որ ժամանակին չէ սկսած «Քորոնա» ժահրին դէմ կանխարգելիչ քայլերու ձեռնարկելը, կը կարծէ, թէ Չինաստան պարտաւոր էր շատ աւելի կանուխ աշխարհը տեղեկացնել այդ ժահրին մասին:
«Չինաստան կարելի ամէն բան պիտի ընէ, որ ես այդ ընտրապայքարին մէջ պարտուիմ», ըսած է Թրամփ:
Սպիտակ տան ղեկավարը կը հաւատայ, որ Փեքին կ’ուզէ նախագահական ընտրութեան յաղթող տեսնել իր մրցակից Ճօ Պայտընը, որպէսզի թուլացնէ առեւտուրի եւ այլ ոլորտներու մէջ իր կողմէ Չինաստանի վրայ գործադրուող ճնշումը:
Չինաստանի արտաքին գործոց նախարարութեան բանբեր Կեն Շուան պատասխանեց Թրամփի խօսքերուն` յայտարարելով. «Միացեալ Նահանգներու նախագահական ընտրութիւնը անոնց ներքին հարցն է: Մենք միջամտելու առումով ոչ մէկ հետաքրքրութիւն ունինք: Նոյն ատեն, մենք յոյս ունինք, որ Միացեալ Նահանգներու քաղաքացիները Չինաստանը չեն ներքաշեր իրենց ընտրական հոլովոյթին մէջ»:
www.aztagdaily.com/archives/471969
