Վարչապետ Փաշինեանի Ուղերձը. «Մենք Ամբողջութեամբ Վճարել Ենք 20-րդ Դարի Բոլոր Պատերազմների Մեր Պարտքը»
11 ՄԱՅԻՍ 2020 – ՀԱՅՈՑ ՑԵՂԱՍՊԱՆՈՒԹԻՒՆ – ԿԸ ՅԻՇԵՄ ԵՒ ԿԸ ՊԱՀԱՆՋԵՄ:
Հայաստանի վարչապետ Նիկոլ Փաշինեանը ուղերձ յղած է Համաշխարհային Բ. պատերազմի յաղթանակի 75-րդ տարեդարձին, Շուշիի ազատագրման եւ Արցախի պաշտպանութեան բանակի ստեղծման օրուան առիթով:
Ուղերձին մէջ նշուած է.
«Սիրելի՛ հայրենակիցներ,
Շնորհաւորում եմ բոլորիս Յաղթանակի օրուան կապակցութեամբ: 75 տարի առաջ այս օրը մեր ժողովուրդը նախկին Խորհրդային Միութեան միւս ժողովուրդների հետ մէկտեղ տօնում էր մարդկութեան պատմութեան ամենամեծ չարիքներից մէկի` ֆաշականութեան դէմ կրած յաղթանակը: Այդ յաղթանակը ձեռք բերուեց մարդկային հսկայական տառապանքների, զոհողութիւնների, աննախադէպ խիզախութեան ու յամառութեան շնորհիւ:
Հայ ժողովուրդը նշանակալից դերակատարում ունեցաւ այդ յաղթանակի կերտման եւ որպէս հետեւանք` ֆաշականութեան արհաւիրքից եւրոպական ժողովուրդներին ազատելու գործում: Խորհրդային բանակում աւելի քան կէս միլիոն հայ մասնակցեց պատերազմին: Հազարաւոր հայեր մարտնչում էին եւրոպական երկրների դիմադրութեան շարժման ջոկատներում: Հայ ժողովուրդը շուրջ 300 հազար կեանք դրեց յաղթանակի զոհասեղանին: Ընդամէնը քառորդ դար առաջ ցեղասպանութիւնից վերապրած ժողովրդի համար դա աներեւակայելի մեծ թիւ էր, որը համեմատելի էր միայն մեծ տէրութիւնների կրած մարդկային կորուստների հետ: Պատերազմի աւարտին Խորհրդային Հայաստանի բնակչութիւնը նուազել էր աւելի քան 13 տոկոսով, այն դէպքում, երբ մեր հողի վրայ պատերազմական գործողութիւններ բնաւ տեղի չէին ունեցել:
Մենք այսօր խոնարհւում ենք մեր նահատակների յիշատակի առջեւ, բայց նաեւ հպարտանում` մեր նախնիների հերոսութեամբ: Պատերազմի ժամանակ 107 հայ արժանացել է Խորհրդային Միութեան հերոսի կոչման` այն բարձրագոյն պարգեւին, որը տրւում էր բացառիկ սխրագործութիւնների համար: Առանձնայատուկ պարծանքի է արժանի նաեւ յաղթանակի համար Հայաստանում եւ սփիւռքում բնակուող հայ ժողովրդի զաւակների եւ յատկապէս Հայաստանեայց առաքելական սուրբ եկեղեցու ներդրած նշանակալից նիւթական աւանդը:
Մենք ամբողջութեամբ վճարել ենք 20-րդ դարի բոլոր պատերազմների մեր պարտքը: Եւ հիմա, առաւել քան ուրիշ ոեւէ մէկը, քաջ գիտակցում ենք խաղաղութեան արժէքը: Մեր ինքնութիւնը լաւագոյնս արտայայտւում է խաղաղութեան պայմաններում, ստեղծագործ եւ կենարար աշխատանքի միջոցով: Միեւնոյն ժամանակ, իմանալով խաղաղութեան գինը, մենք միշտ պատրաստ ենք ամէն գնով պաշտպանել այն եւ հարկ եղած դէպքում վերստին մարտնչել մեր ազատութեան եւ արժանապատուութեան համար:
Զուգադիպութիւն, կամ գուցէ նախախնամութեամբ կանխորոշուած օրինաչափու¬թիւն է, որ այս օրերին մենք տօնում ենք նաեւ Շուշիի ազատագրումն ու Արցախի պաշտպանութեան բանակի ստեղծումը: Իրադարձութիւններ, որոնք բացառիկ նշանակութիւն ունեցան մեր նորագոյն պատմութեան համար: Շուշիի ազատագրումն ազդարարեց Արցախի ազատագրման սկիզբը: Պսակուելով փայլուն յաղթանակով` այն իր հերթին դարձաւ մեր ժողովրդի անվտանգութեան ապահովման եւ խաղաղութեան պահպանութեան առհաւատչեան: Այսօր եւս մենք հաստատակամ ենք. Արցախի Հանրապետութեան ժողովրդի անվտանգութիւնն ու ինքնորոշման իրաւունքի իրացումը սակարկութեան առարկայ չեն: Դրանք բացարձակ արժէքներ են մեզ համար:
Յիշենք եւ արժանին մատուցենք Շուշիի եւ ողջ Արցախի ազատագրման համար զոհուած մեր հերոսներին: Նրանք կանգնեցին նոյնքան ամուր, որքան իրենց պապերը մօտ կէս դար առաջ` Երկրորդ համաշխարհային պատերազմում: Յիշենք ապրիլեան քառօրեայ պատերազմում ընկած մեր երիտասարդներին` մեր նորօրեայ հերոսներին, ովքեր իրենց կեանքով ապացուցեցին, որ անմար են մեր ժողովրդի ազատատենչ ոգին եւ կամքը:
Փա՛ռք հայ ժողովրդի ազատութեան համար մարտնչած բոլոր հերոսներին:
Կեցցէ՛ յաւիտենական Հայաստանը»:
aztagdaily.com/archives/472547
