Ոմանք փորձում են Հայաստանի օրինական ներկայացուցիչներին բանակցային սեղանի շուրջ կաշկանդել. Նիկոլ Փաշինյան
16.05.2020 | Ներքին կյանք | Lragir.am:
«Ես մի միտում եմ նկատում՝ ոմանք փորձում են Հայաստանի օրինական ներկայացուցիչներին բանակցային սեղանի շուրջ կաշկանդել՝ անընդհատ ասելով, վայ, էս ի՞նչ ա կատարվում»,- այսօրվա ասուլիսում ասաց վարչապետ Նիկոլ Փաշինյանը:
Նա նշեց, որ Ղարաբաղի հարցի հիմքում կա դրված մեկ սկզբունք՝ որևէ բան որոշված չէ, քանի դեռ ամեն ինչ համաձայնեցված չէ:
«Բանակցային սեղանի շուրջ ամենատարբեր մարդիկ են նստած, կարող են հնչեցնել ամենաընդունելիից ամենաանընդունելի գաղափարներ: Եվ ի՞նչ, ուզում են այնպիսի իրավիճակ ստեղծեն, որ այնքան կաշկանդեն, որ Հայաստանի ներկայացուցիչները ականջները փակեն, ասենք՝ մենք չենք լսում կամ թողնեն փախնե՞ն բանակցությունների սեղանի մոտից:
Ղարաբաղի հարցի լուծողը հայ ժողովուրդն է, և ես մեր սկզբունքները բազմիցս հրապարակել եմ: Եվ մենք կաշկանդված չենք լինելու բանակցային սեղանի շուրջ, բանակցային սեղանի շուրջ կարող են հնչել ամենատարբեր գաղափարներ, որովհետև մեր խնդիրը այն է, որ գտնենք փոխադարձաբար ընդունելի լուծում: Իսկ գտնել նշանակում է փնտրել:
Իսկ փնտրել նշանակում է խոսել, իսկ խոսել նշանակում է՝ վստահ լինել, որ պատկերացնում ենք ինչ ենք ուզում և վստահ լինել սեփական ուժերին: Եվ վստահ լինել, որ ունենք ժողովրդի մանդատը՝ բանակցելու:
Մենք դրանում վստահ ենք, և բանակցություննեի սեղանի շուրջ, այդ թվում՝ հայաստանյան որոշ ուժեր մեզ չեն կարողանալու կաշկանդել»,- նշեց Փաշինյանը:
Վարչապետն ասաց, որ բազմիցս արտահայտել են իրենց կարծիքը նաև այն մասին, որ Արցախի ընտրված ներկայացուցիչների մասնակցությունը բանակցություններին շատ էական և կարևոր է:
«Մենք չենք պատկերացնում լուծում առանց Արցախի ընտրված ներկայացուցիչների մասնակցության: Խոսքն այն մասին է, որ մեզ Արցախին չի հաջողվել վերադարձնել բանակցային սեղան այնպես, ինչպես չի հաջողվել բանակցային սեղան վերադարձնել վերջին 22 տարում, երբ 1998 թվականին Արցախը բանակցային սեղանից դուրս թողնվեց:
Եվ 22 տարի ԵԱՀԿ Մինսկի խումբը, ամբողջ միջազգային հանրությունը աշխատել է այդ սկզբունքով, եղել է լռելյայն կոնսենսուս, որ Արցախը պետք է բանակցությունների սեղանի շուրջ չլինի:
Սա իր հետ բերում է որոշակի բարդություններ, մեր պատկերացումն այն է, որ Արցախի հարցը չի կարող լուծվել առանց Արցախի ընտրված ներկայացուցիչների:
Մենք չենք կարող որոշումներ կայացնել Արցախի ընտրված ներկայացուցիչների փոխարեն»,- ասաց նա:
www.lragir.am/2020/05/16/546924/
