Իրան Պիտի Մնայ Սուրիոյ Մէջ. Թեհրան. «Պիտի Հակադարձենք Վենեզուելլա Ուղղուող Մեր Քարիւղատար Նաւերուն Դէմ Ամերիկեան Որեւէ Քայլի»
19 ՄԱՅԻՍ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ: – ՀԱՅՈՑ ՑԵՂԱՍՊԱՆՈՒԹԻՒՆ – ԿԸ ՅԻՇԵՄ ԵՒ ԿԸ ՊԱՀԱՆՋԵՄ:
Իրանի արտաքին գործոց նախարարութեան բանբեր Ապպաս Մուսաւի յայտնեց, որ իր երկիրը պիտի հակադարձէ Վենեզուելլա ուղղուող իրանեան քարիւղատարներուն դէմ ամերիկեան որեւէ քայլի` ընդգծելով. «Իրանեան նաւերը Վենեզուելլա քարիւղ կը փոխադրեն պաշտօնապէս եւ` իրաւական գետնի վրայ օրինական առեւտուրի ծիրին մէջ»:
«Եթէ Ամերիկա նեղացած է իրանեան քարիւղի Վենեզուելլա փոխադրումէն, ապա ատիկա իր հարցն է: Մեր քարիւղատարներուն ուղղուած անոր սպառնալիքները անօրինական են եւ որեւէ թիրախաւորման պարագային հակադարձութեան պիտի արժանանան», զգուշացուց Մուսաւի:
«Ամերիկացիները զգուշացուցինք Վենեզուելլա ուղղուող մեր քարիւղատար նաւերուն դէմ որեւէ քայլի հետեւանքներէն, եւ կը յուսանք, որ որեւէ անմտութիւն չեն գործեր, որովհետեւ Իրան պիտի հակազդէ», նշեց ան:
Իրանի արտաքին գործոց նախարարութեան բանբերը շեշտեց, որ անկախ երկիրներուն միջեւ առեւտուրը օրինական է, իսկ Միացեալ Նահանգներու նախագահ Տանըլտ Թրամփ կը ջանայ համաշխարհային համակարգը խանգարել:
Միւս կողմէ` Մուսաւի յայտնեց. «Սուրիոյ մէջ իրանեան խորհրդատուական ներկայութիւնը սուրիական օրինական ու պաշտօնական կառավարութեան խնդրանքով է, եւ Իրան Սուրիոյ ահաբեկչութեան դէմ պայքարի ոլորտին մէջ աջակցութիւն կը տրամադրէ»:
«Իրան Սուրիոյ մէջ պիտի մնայ այնքան ատեն, որ Սուրիոյ կառավարութիւնն ու ժողովուրդը տարբեր մարզերու մէջ մեր օժանդակութիւնը կ՛ուզեն», յայտարարեց Իրանի արտաքին գործոց նախարարութեան բանբերը:
www.aztagdaily.com/archives/473142
