«Մենք Առաւել Քան Պարզ Արտայայտուել Ենք` Չենք Հանդուրժելու Սպառնալիքն Ու Ուժի Կիրառումը». Զօհրապ Մնացականեան
28 ՄԱՅԻՍ 2020 – ՀԱՅՈՑ ՑԵՂԱՍՊԱՆՈՒԹՈՒՆ – ԿԸ ՅԻՂԵՄ ԵՒ ԿԸ ՊԱՀԱՆՋԵՄ:
ԵՐԵՒԱՆ, «Արմէնփրէս».- Հայաստանի արտաքին գործոց նախարար Զօհրապ Մնացականեան հաստատեց, որ հայկական կողմը բոլոր մակարդակներու վրայ առաւել քան պարզ արտայայտուած է, որ պիտի չհանդուրժէ հակառակորդին կողմէ սպառնալիքը եւ ուժի կիրառումը: Ան այս մասին ըսաւ Ազգային ժողովին մէջ, կառավարութեան անդամներուն հետ հարցում-պատասխանի ընթացքին` պատասխանելով «Բարգաւաճ Հայաստան» խմբակցութեան պատգամաւոր Սերգէյ Բագրատեանի հարցումին, որ կը վերաբերէր վերջին շրջանին Ատրպէյճանի կողմէ ձեռնարկուող հետախուզական գործողութիւններուն:
Ան վստահեցուց, որ հայկական կողմը մնայուն կերպով կ՛աշխատի ԵԱՀԿի Մինսկի խումբի համանախագահութեան շրջանակներուն մէջ եւ համանախագահներուն հետ ուղղակիօրէն: «Վստահեցնում եմ, որ առաւել քան հետեւողական է Հայաստանի քաղաքականութիւնն այն մասով, ինչ վերաբերւում է սպառնալիքի եւ ուժի կիրառման մերժմանը` այն կոնտեքստում (համաբնագիրին մէջ-Խմբ), որ մենք առաւել քան պատրաստ ենք դրան արձագանգել», դիտել տուաւ Մնացականեան:
Ան շեշտեց, որ Հայաստան ունի իր հետեւողական քաղաքականութիւնը` բոլոր հարցերուն պարագային՝ խաղաղ լուծման մօտեցումներուն, խաղաղ կարգաւորման գործընթացին մասնակցութեան, համապատասխան միջավայրի ստեղծման վերաբերող: «Սա ասուած է, սա արտայայտուած է, սա դիրքորոշում է եւ հետեւողականօրէն տարւում է առաջ` բոլոր մակարդակներով` լինի բուն բանակցային գործընթացը, թէ մեր ներգրաւումները բազմակողմ, երկկողմ մակարդակներով` մեր գործընկերների հետ: Կոպիտ ասած` մենք շատ յստակ գիտենք ինչ ենք ասում, շատ յստակ ասում ենք, եւ կարիք չունենք դրան լրացուցիչ անտեղի էմոցիոնալ (զգացական-Խմբ.) գոյներ տալու», հաստատեց նախարարը:
Asbarez.com/arm/370501/Մենք-Առաւել-Քան-Պարզ-Արտայայտուել-Են/
