Եգիպտոսի Զօրքերը Մուտք Գործած Են Լիպիա` Յաջակցութիւն Հաֆթարի
09 ՅՈՒՆԻՍ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ԿԸ ՅԻՂԵՄ ԵՒ ԿԸ ՊԱՀԱՆՋԵՄ:
Թուրքիա Կը Մեղադրէ` Եգիպտոսը ՄԱԿ-ի Բանաձեւերը Խախտելու Յանցանքով
Եգիպտոսի խորհրդարանի նախագահ Ալի Ապտելալ յայտարարած է, թէ Լիպիոյ ներքին գործերուն Թուրքիոյ միջամտութիւնը անընդունելի է, եւ թէ Եգիպտոս օգնութիւն խոստացած է «լիպիացի եղբայրներուն»: Այս մասին կը հաղորդէ եգիպտական «Ահրամ Անլայն» կայքը:
Միաժամանակ եգիպտական զօրքերը կտրած են Լիպիոյ սահմանը` օգնելու համար Լիպիոյ ազգային բանակի հրամանատար զօր. Խալիֆա Հաֆթարին: Եգիպտոսի զօրքերու շարժման նկարները արդէն տարածուած են համացանցի վրայ: Տեսանիւթերուն մէջ կ՛երեւին Եգիպտոսի դրօշով ամերիկեան արտադրութեան «Ապրամս» հրասայլերն ու այլ սպառազինութիւն:
«Թուրքիոյ կողմէ Լիպիոյ հարցերուն միջամտութիւնը սպառնալիք է արաբական տարածաշրջանի անվտանգութեան: Եգիպտոս պիտի չարտօնէ իր ազգային անվտանգութեան ուղղուած սպառնալիքը: Եգիպտոս պիտի չլքէ իր լիպիացի եղբայրները եւ պիտի պաշտպանէ զանոնք», յայտարարած է Եգիպտոսի օրէնսդիր մարմինի ղեկավարը:
Ապտելալ նշած է, որ եգիպտացի պաշտօնատարները նամակ ուղարկած են պաշտպանելով նախագահ Ապտելֆաթթահ Սիսիի` Լիպիոյ մէջ զինեալ հակամարտութիւնը լուծելուն ուղղուած ջանքերը` ՄԱԿ-ի բանաձեւերուն եւ Պերլինի յունուարեան խորհրդաժողովի արդիւնքներուն համապատասխան:
«Գահիրէի հռչակագիրը ուղղուած է Լիպիոյ մէջ միասնութեան կայունութեան հաստատման եւ ցոյց կու տայ, թէ Եգիպտոս ձեռնածալ պիտի չմնայ Լիպիոյ կայունութեան սպառնացող զարգացումներուն ի տես», ըսած է Ապտելալ` աւելցնելով. «Եգիպտոս եւ Լիպիա առնչուած են պատմական իրադարձութիւններով ու ընկերային կապերով, ուստի Եգիպտոս կարելի ամէն բան պիտի ընէ լիպիացի ժողովուրդին շահերը պաշտպանելու համար»:
Նշենք, որ Ռուսիա երէկ վերահաստատեց Լիպիոյ մէջ զինադադար հաստատելու եգիպտական նախաձեռնութեան իր զօրակցութիւնը: Ռուսիոյ նախագահ Վլատիմիր Փութին եգիպտացի իր պաշտօնակիցին հետ քննարկեց Լիպիոյ վերջին զարգացումները: Անոնք հաստատեցին միջլիպիական բանակցութիւններուն կարելի եղածին չափ շուտ սկսիլը երաշխաւորելու իրենց հասարակաց վճռակամութիւնը:
Թրքական պետական «Անատոլու» լրատու գործակալութիւնը հաղորդեց, որ Թուրքիոյ արտաքին գործոց նախարարութեան բանբեր Համի Աքսոյ Եգիպտոսի կառավարութիւնը մեղադրած է ՄԱԿ-ի Ապահովութեան խորհուրդի բանաձեւը խախտելու յանցանքով:
«Եգիպտոսի ապստամբ Հաֆթարին երկարատեւ զինուորական աջակցութիւնը ՄԱԿ-ի Ապահովութեան խորհուրդի բանաձեւերու յստակ խախտում է», ըսած է Աքսոյ:
Ան անդրադարձած է Եգիպտոսի կողմէ Լիպիոյ ազգային բանակի հրամանատար Խալիֆէ Հաֆթարին տրուող աջակցութեան:
Լիպիոյ ազգային բանակը երէկ հաղորդեց, որ իր օդանաւերը Սերթ քաղաքի արեւմուտքը քանդած են թուրք սպաներ փոխադրող զինուորական մեծ շարասիւն մը` աւելցնելով, որ սպաները սպաննուած են:
Օդուժը գիշերային հարուածներու ընթացքին քանդած է թրքական արտադրութեամբ երեք «Հաուիցըր» հրետանիներ, երկու հրասայլեր, ինչպէս նաեւ զրահապատ մեքենաներ:
Բանակէն աղբիւր մը հաղորդեց, որ երէկ Սերթի մօտ տեղի ունեցած բուռն բախումներուն ընթացքին Միսրաթա քաղաքէն եկած աւելի քան քառասուն զինեալներ սպաննուած են:
aztagdaily.com/archives/474694
