Գլենդելը Միացաւ «Սեւամորթ Կեանքերն Արժէք Ունեն» Շարժմանը
09 ՅՈՒՆԻՍ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ԿԸ ՅԻՂԵՄ ԵՒ ԿԸ ՊԱՀԱՆՋԵՄ:
«Վերջ ռասիզմին եւ սոցիալական անարդարութեանը», «Չկայ արդարութիւն, չկայ խաղաղութիւն», «Դատապարտում ենք ոստիկանների կողմից բռնութիւնները» կոչերով ու ցուցապաստառներով շուրջ երկու հազար մարդ Գլենդելում քայլերթով միացաւ «Սեւամորթ կեանքերն արժէք ունեն» համերկրային շարժմանը:
Յունիսի 7ի արշաւն աւարտուեց քաղաքապետարանին կից տարածքում՝ խաղաղ հանրահաւաքով, որի մասնակիցներն իրենց համերաշխութիւնը յայտնեցին սեւամորթ համայնքին՝ յարգելով Մայիսի 25ին սպանուած Ջորջ Ֆլոյդի յիշատակն ու դատապարտելով ընկերային (սոցիալական) եւ ցեղային (ռասայական) խտրականութիւնը:
«Մենք ցանկանում ենք փոփոխութիւն մարդկանց գիտակցութեան մէջ, մտածելակերպում եւ զգացումներում: Սակայն գիտակցութիւնը չի փոխւում խօսքով, քայլերթով, այն փոխւում է ամէնօրեայ սովորութիւն դարձող գործողութիւններով: Սա երկար ճանապարհ է, եւ այսօր այդ ուղու մեկնարկն է: Իւրաքանչիւրդ պէտք է ստանձնի անձնական պատասխանատուութիւն եւ ձեր գործողութիւնները պէտք է ներառեն տարբեր ջանքեր, այդ թւում՝ դիմումներ ընտրուած ներկայացուցիչներին, բիւջէների վերանայման պահանջ նաեւ տեղական կառավարման մարմիններում», նշեց հանրահաւաքի համակազմակերպիչ՝ «Սեւամորթ Գլենդել» կազմակերպութեան ներկայացուցիչը:
««Ուայ.Էմ.Սի.Էյ» Գլենդել»ի նախագահ Սառա Թարսոնն էլ նշեց, որ պատրաստւում են երկխօսութիւն սկսել քաղաքապետարանի հետ տարբեր ծրագրերի շուրջ. «Մե՛նք պէտք է ուշադրութիւն դարձնենք Գլենդելի քաղաքապետարանի բիւջէին: Օրինակ, քառասուն տոկոս յատկացւում է ոստիկանական վարչութեանն այն դէպքում, երբ կարծում եմ, որոշակի գումարներ պէտք է ուղղուեն բռնութիւնների կանխարգելմանը, երիտասարդներին սոցիալական արդարութեան հարցերում կրթելուն, ինչպէս նաեւ՝ բազմաէթնիկ հանրութեանը միմեանց հետ առաւել ծանօթացնելու նախաձեռնութիւններին»: Թարսոնը նշեց, որ սեւամորթ համայնքին աջակցելու նպատակով խաղաղ հանրահաւաքը ազգային տարբեր խմբերի համախմբման հրաշալի առիթ էր՝ հասկանալու միմեանց տարբերութիւնները, նաեւ՝ տեսնելու, որ բազմաթիւ ընդհանրութիւններ ունենք:
Գլենդելի քաղխորհրդի անդամ Արտաշէս Քասախեանն էլ ընդգծեց, որ դիմել է քաղխորհրդի իր գործընկերներին, որպէսզի քաղաքապետարանը պաշտօնական կեցուածքն արտայայտի ռասայական հարցերի շուրջ, եւ ստեղծուի համագործակցութեան խաղաղ միջավայր, որտեղ հնարաւոր կը լինի քննարկել սոցիալական արդարութեանն ու խտրականութեանն առնչուող իւրաքանչիւրբ հարց: «Ինչու է դա կարեւոր, որովհետեւ մարդիկ, հնարաւոր է ասեն, որ այսօրուայ Գլենդելում նման խնդիրներ չկան, սակայն մեր քաղաքը ռասայական հարցերում վատ անցեալ ունի, եւ մենք պէտք է մէկընդմիշտ տարանջատենք մեր քաղաքի ապագան անցլալից ու նոր էջ բացենք»:
Գլենդելի ոստիկանապետ Կառլ Պովիլիատիսը նշեց, որ իւրաքանչիւր քաղաքացու սահմանադրական իրաւունքն է խաղաղ կերպով արտայայտելու մտահոգութիւնները, զգացմունքները, եւ քաղաքի ոստիկանական բաժանմունքն էլ պատշաճ կերպով յարգում է այդ իրաւունքը. «Մեր ոլորտի չի գտնուի ոչ մի արհեստավարժ, ով դիտելով Ջորջ ֆլոյդի տեսանիւթը չի ասի, որ այն սխալ էր, ուղղակի սխալ էր: Նման գործելաոճը Գլենդելի ոտիկանական համակարգի արժեհամակարգի մաս չէ, եւ ես ցանկանում եմ հաւաստիացնել, որ մարդիկ մեր քաղաքում իրենց ապահով ու անվտանգ զգան, դա ապահովելն է մեր առաքելութիւնը», յայտնեց Պովիլիատիսը:
Գլենդելում կայացած ձեռնարկի ժամանակ փոխանցուեց հայ Առաքելական եկեղեցու երկու թեմերի առաջնորդների ուղերձը: Ձեռնարկի կազմակերպմանը մասնակցել ու իրենց աջակցութիւնն էին յայտնել ամերիկահայ հասարակական, քաղաքական, մշակութային գործիչներ, կրթական ոլորտի ներկայացուցիչներ ու համայնքային տարբեր կազմակերպութիւններ, այդ թւում՝ Հայ Դատի յանձնախմբի Արեւմտեան շրջանը, Հայ Երիտասարդաց Դաշնակցութիւնը՝ «Հայերը՝ Սեւամորթ համայնքի համար» ցուցապաստառներով:
Գլենդելի Միացեալ կրթաշրջանի կառավարիչ Վիվիէն Էքչեանը կարեւորեց հայ համայնքի ներկայութիւնը հանրահաւաքին՝ նշելով, որ չափազանց կարեւոր է երիտասարդներին նաեւ այս ձեւով սոցիալական արդարութեան եւ միմեանց աջակցելու մասին կրթելը. «Կարեւոր է, որ երիտասարդները տեղեակ լինեն, որ մեր քաղաքում իւրաքանչիւրին տրուած է յաջողութեան հասնելու հաւասար հնարաւորութիւն եւ մեր կրթական համակարգն ունի սոցիալական արդարութեան վրայ հիմնուած օրակարգ»:
Հասարակական գործիչ, հանրահաւաքի կազմակերպիչներից Էլէն Ասատրեանի հաւաստմամբ, «որպէս քաղաք, մենք պարտականութիւն ունենք անարդարութեան դէմ պայքարելու եւ կիսելու սեւամորթ համայնքի պայքարը, ճիշդ այնպէս, ինչպէս մենք պայքարել ենք Ցեղասպանութեան եւ այլ հայկական հարցերի համար»:
Ամերիկահայ երաժիշտ Արմինը եւս կարեւորեց շարժման կողքին հայ համայնքի գտնուելը. «Մենք հիացմունքով ենք հետեւել եւ շատերիս վրայ մեծ ազդեցութիւն են ունեցել սեւամորթների կողմից ստեղծուած երաժշտական ուղղութիւնները, ունենք բազմաթիւ սիրուած մարզիկներ: Այն ինչ տեղի է ունեցել եւ շարունակում է պատահել սեւամորթ համայնքի ներկայացուցիչների հետ, նաեւ մարդկութեան դէմ յանցագործութեան հարց է, եւ ինչպէս ցանկանում ենք, որ հայերի կողքին կագնեն մեր Դատի համար, այնպէս էլ մենք պէտք է լինենք սեւամորթ համայնքի կողքին»:
Պարող Միհրան Կիրակոսեանն էլ նշեց, որ մշակութային գործիչները, ովքեր ձայն եւ հետեւորդներ ունեն հայ համայնքում, օգտագործում են իրենց հարթակները իրազակելու «Սեւամորթների կեանքն արժէք ունի» շարժման մասին՝ «Ամէն ինչ շատ պարզ է, մենք ցանկանում ենք, որ աշխարհը լինի աւելի լաւ տեղ՝ վերջ դնենք ռասիզմին»:
Հայ Դատի Գլենդելի յանձնախումբը իւրովի էր միացել ձեռնարկին՝ նաեւ ջուր բաժանելով ցուցարարներին:
Գլենդելում կազմակերպուած քայլարշաւին ու հանրահաւաքի աւարտին տեղի ունեցաւ մոմավառութիւն:
asbarez.com/arm/371125/Գլենդելը-Միացաւ-Սեւամորթ-Կեանքերն-Ա/
