Ազրպէյճանցի Քաղաքական Ներգաղթեալներու Ցոյց Մերքելի Նստավայրին Մօտ. «Եւրոպական Միութիւնը Պէտք Չէ Համագործակցի Ազրպէյճանի Հակաժողովրդավարական Վարչակազմին Հետ»
13 ՅՈՒՆԻՍ 2020 –
Գերմանիոյ մէջ ապրող ազրպէյճանցի խումբ մը քաղաքական ներգաղթեալներ 11 յունիսին բողոքի ցոյց կատարած են Պերլինի մէջ` Գերմանիոյ վարչապետ Անկելա Մերքելի նստավայրի դիմաց: Ցոյցը կազմակերպուած էր ի նշան բողոքի 8 յունիսին Պաքուի Եասամալի շրջանին մէջ ոստիկանութեան յատուկ գործողութիւններու դէմ: Այս մասին կը գրէ ազրպէյճանական ընդդիմադիր «Մէյտան Թի.Վի.»-ի կայքը:
Ցոյցի մասնակիցները պահանջած են, որ ոստիկանական գործողութիւնը կազմակերպած բոլոր անձերը` ներքին գործոց նախարարի գլխաւորութեամբ, պատժուին:
Ցոյցին ընթացքին ազրպէյճանցի նախկին լրագրող Աֆղան Մուխթարլըն Գերմանիոյ կառավարութեան կոչ ուղղած է` «վերատեսութեան ենթարկելու իր դիրքորոշումը բռնակալներու նկատմամբ»: Անոր խօսքով` Պերլին պէտք չէ համագործակցի Ազրպէյճանի հակաժողովրդավարական վարչակարգին հետ:
«Եւրոպական Միութիւնը պէտք չէ անտարբեր ըլլայ Ազրպէյճանի մէջ տեղի ունեցող հակաժողովրդավարական գործողութիւններու եւ ապօրինի ձերբակալութիւններու նկատմամբ», ըսած է Մուխթարլըն:
Նոյն օրը նոյնպիսի բողոքի ցոյց մը տեղի ունեցած է նաեւ Պերլինի մէջ Ազրպէյճանի դեսպանատան դիմաց:
aztagdaily.com/archives/475067
