Շիրինեան. «Յաջողած Ենք Կանխել Թրքամէտ Եւ Ազրպէյճանամէտ Թեկնածուներու Յաղթանակը»
02 ՅՈՒԼԻՍ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ԵԿՈՒՈՐ ՔՈՉՈՒՈՐ ԹՈՒՐՔԵՐԸ ԵՒ ՄԵՆՔ ՀԱՅԵՐՍ:
Ֆրանսայի մէջ կիրակի օր տեղի ունեցած տեղական ինքնակառավարման մարմիններու ընտրութիւնները գոհացուցիչ են ֆրանսահայ համայնքին համար. «Ֆրանսայի ընտրութիւններուն հայ համայնքին համար երկու կարեւոր հանգամանք կայ. առաջինը թուրք-ազրպէյճանական աջակցութիւնը վայելող թեկնածուներու չընտրուիլն է: Երկրորդը` հայ համայնքի, հայկական կազմակերպութիւններու բարեկամներու յաջողութիւնը», «Ռատիոլուր»-ին ըսաւ ՀՅԴ Եւրոպայի Հայ դատի գրասենեակի հաղորդակցութեան եւ հանրային կապերու պատասխանատու Յարութ Շիրինեան:
28 յունիսին տեղի ունեցած տեղական ընտրութիւններու երկրորդ փուլին արդիւնքներով Փարիզի քաղաքապետ վերընտրուած է Անն Իտալկոն: Վերջին ամիսներուն ֆրանսահայերը կ՛ահազանգէին. Իտալկոյի քաղաքական հակառակորդը` Ռաշիտա Տաթին Ազրպէյճանի եւ Թուրքիոյ մեծ բարեկամն է. եղած է Ազրպէյճանի բարեկամներու միութեան անդամ, որ կը նկատուի Ֆրանսայի մէջ «խաւիարային դիւանագիտութեան» գլխաւոր գործիքն ու յայտնի է ամբողջատիրական Ազրպէյճանի իշխանութիւններու հետ սերտ կապերով:
Հայաստանի, Հայ դատի եւ հայ համայնքի լաւ բարեկամ Անն Իտալկոյի վերընտրուիլը չէ միայն, որ 28 յունիսի ընտրութիւններու արդիւնքներով գոհ է հայ համայնքը. «Ֆրանսայի կեդրոնական շրջաններուն մէջ Էրտողանի ջանքերով որոշ ցուցակներու մէջ ընդգրկուած էին թրքական ծագումով ֆրանսացիներ, որոնք աւելի ուշ Հայոց ցեղասպանութիւնը հրապարակայնօրէն ժխտած էին: Եւ հայ համայնքը մեծ պայքար տարաւ, որպէսզի այդ թեկնածուները ձախողին», ըսաւ Յարութ Շիրինեանը:
Բայց կիրակի օր տեղի ունեցած քուէարկութենէն ետք «եան»-ով կ՛աւարտի ո՛չ միայն Ֆրանսայի, այլեւ Եւրոպական Միութեան ամէնէն կարեւոր քաղաքներէն մէկուն ղեկավարին մականունը. Ժանն Բարսեղեանն է Սթրազպուրկի նոր քաղաքապետը:
Ֆրանսահայութեան համար շատ կարեւոր է, որ հայկական համայնքի ներկայացուցիչները ներկայացուած ըլլան երկրի քաղաքական կեանքին մէջ, կ՛ըսէ Յարութ Շիրինեան: Ժանն Բարսեղեանի հետ համագործակցութեան եզրեր կը նախանշուին. «Տիկին Բարսեղեանը բաւական հետաքրքրուած է Հայաստանի բնապահպանական ոլորտով: Հաւանական է, որ Հայ դատի գրասենեակը եւ հայ համայնքը անոր աջակցութիւն ցուցաբերեն` միասին ծրագիրներ իրականացնելու», ըսաւ Շիրինեան:
aztagdaily.com/archives/476732
