ԱՄՆ Քոնկրէսականները Իրենց Զօրակցութիւնը Յայտնած Են Հայաստանին ու Հայ Ժողովուրդին
14 ՅՈՒԼԻՍ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ԵԿՈՒՈՐ ՔՈՉՈՒՈՐ ԹՈՒՐՔԵՐԸ ԵՒ ՄԵՆՔ ՀԱՅԵՐՍ:
ԱՄՆ Քոնկրէսի հայկական հարցերու յանձնախումբի համանախագահ Ֆրենք Փըլոն եւ Ծերակուտական Էդուարդ Մարքին նոյնպէս իրենց զօրակցութիւնը յայտնած են Հայաստանին եւ հայ ժողովուրդին` դատապարտելով Ատրպէյճանի բախում հրահրող սադրիչ գործողութիւնները:
«Ատրպէյճան հերթական անգամ կը փորձէ պատերազմ սկսիլ Հայաստանի հետ: Ատրպէյճանի կողմէ Հայաստանի ու Արցախի դէմ մշտապէս թէժ հռետորաբանութիւն կիրառելը եւս մէկ բախում հրահրելու համաձայնեցուած ջանքերու մաս է»,- «Արմենփրես»-ի հաղորդմամբ` «Թուիթըր»-ի իր էջին վրայ գրած է ֆրենք Փըլոն:
Էդուարդ Մարքին նոյնպէս «Թուիթըր»-ի իր էջին վրայ կատարած գրառմամբ աջակցութիւն յայտնած է Հայաստանին:
«Ես կանգնած եմ Հայաստանի կողքին, քանի որ ան կը պաշտպանէ իր տարածքային ամբողջականութիւնը: Ատրպէյճանն ու Թուրքիան պէտք է յարգեն հայ-ատրպէյճանական սահմանը, պէտք է յարգեն Լեռնային Ղարաբաղի ժողովուրդին ձգտումները եւ պէտք է անմիջապէս վերջ տան ընդհարումին»,-նշած է ան:
Քոնկրէսական Ատըմ Շիֆ մտահոգութիւն յայտնած հայ-ատրպէյճանական սահմանին Տաւուշի ուղղութեամբ Ատրպէյճանի սադրիչ եւ ապակայունացնող գործողութիւններու առնչութեամբ: «Արմենփրես»-ի փոխանցմամբ` այս մասին Շիֆ գրած է «ֆէյսպուք»-ի իր էջին վրայ:
«Ես շատ մտահոգուած եմ վերջին օրերուն հայկական սահմանի երկայնքով Ատրպէյճանի սադրիչ եւ ապակայունացնող գործողութիւններով, ներառեալ հայ զինուորներու գնդակոծումը: Այս գործողութիւնները կը վտանգեն զինուորներու եւ քաղաքացիներու կեանքը եւ կը մեծցնեն հակամարտութեան բարձրացող վտանգը, որ կրնայ կործանարար հետեւանքներ ունենալ տարածաշրջանի համար, յատկապէս համաշխարհային համավարակի տարածման ընթացքին»,- գրած է Շիֆ:
Քոնկրէսականը նշած է, որ այդ գործողութիւնները պէտք է դիտարկել նաեւ Հայաստանի եւ Արցախի նկատմամբ Ատրպէյճանի հետեւողականօրէն ռազմատենչ հռետորաբանութեան եւ անոնց սահմաններու միջազգային մշտադիտարկում թոյլ չտալու պարունակին մէջ:
«Ես կոչ կ՛ընեմ ԱՄՆ արտաքին գործոց նախարարութեան կողմերուն պարզաբանել զսպուածութեան եւ դիւանագիտութեան, ինչպէս նաեւ լարուածութեան թուլացման անհրաժեշտութիւնը»,- նշած է Քոնկրէսականը:
yerakouyn.com/2020/07/14/ամն-քոնկրէսականները-իրենց-զօրակցութ/
