Թուրքիա ափսոսանք կը յայտնէ քրտական ուժերու եւ ամերիկեան կազմակերպութեան մը միջեւ կնքուած քարիւղի գործարքին համար
04 ՕԳՈՍՏՈՍ 2020 – Թուրքիայ – Նորութիւններ:
Թուրքիոյ արտաքին գործոց նախարարութիւնը արձագանգած է Սուրիոյ ժողովրդավարական ուժերուն եւ ամերիկեան «Տելթա Քրեսընթ Էնըրճի» ընկերութեան միջեւ Սուրիոյ հիւսիս-արեւելքին մէջ քարիւղի միացեալ արդիւնահանման եւ վերամշակման վերաբերեալ կնքուած համաձայնագիրին: Այս մասին կը հաղորդէ «Անատոլու» լրատու գործակալութիւնը:
«Սուրիոյ բնական հարստութիւնները կը պատկանին սուրիացի ժողովուրդին: Մենք ափսոսանք կը յայտնենք, որ Միացեալ Նահանգներ կ՛աջակցին այս քայլին, որ կ՛ոտնահարէ միջազգային օրէնքները, Սուրիոյ տարածքային ամբողջականութիւնն ու գերիշխանութիւնը` յօգուտ ահաբեկչութեան: Ասիկա ոչ մէկ օրինական դրդապատճառներով կրնայ արդարացուիլ, ասիկա ամբողջովին անընդունելի է», նշուած է Թուրքիոյ արտաքին գործոց նախարարութեան հրապարակած յայտարարութեան մէջ:
Թուրքիոյ արտաքին գործոց նախարարութիւնը նաեւ նշած է. «Քրտական ուժերը նպատակ ունին սուրիացի ժողովուրդի հարստութիւնները օգտագործելու միջոցով անջատողական օրակարգ յառաջ մղել»:
akunq.net/am/?p=72022
