Ով է ոչնչացրել ադրբեջանական դրոնները – հայկական ուժերը կարողացան ոչ միայն խփել դրոնները, այլ նաեւ իջեցնել առանց վնասելու
14.08.2020 | Քաղաքականություն | ՆԱԻՐԱ ՀԱՅՐՈՒՄՅԱՆ, Մեկնաբան:
«Մեր բախտը բերել է, որ կիսվում ենք փորձով այսքան ուժեղ բանակի հետ:
Թուրքիայի բանակը ցույց է տվել իր ուժը Սիրիայում, Իրաքում եւ Լիբիայում: Աստված տա, որ Թուրքիայի զինված ուժերի աջակցությամբ Ադրբեջանի բանակը կատարի իր սրբազան պարտքը», – ասել է Ադրբեջանի պաշտպանության նախարար Զաքիր Հասանովը իր թուրք գործընկեր Հուլուսի Աքարի հետ հանդիպմանը:
Թուրքիայի պաշտպանության նախարար Հուլուսի Աքարը նշել է, որ թուրքական բանակն Ադրբեջանին կցուցաբերի անհրաժեշտ աջակցություն: «Մեր ողջ հզորությունն Ադրբեջանի կողմից է Հայաստանին դիմակայելու գործում… Ադրբեջանը մենակ չէ: Մենք շարունակելու ենք Ադրբեջանի արդար պայքարին: Թուրքիայի 83 միլիոն բնակչությունն Ադրբեջանի կողքին է օկուպացված տարածքների ազատագրման գործում», – ասել է Հուլուսի Աքարը:
Տավուշի դեպքերից հետո Թուրքիան ու Ադրբեջանն արդեն առաջին հարձակումը չեն անում Հայաստանի վրա՝ միաժամանակ նայելով Ռուսաստանի կողմ: Ադրբեջանի նախագահը զանգել է Վլադիմիր Պուտինին, եւ ինչպես հայտնում են Ալիեւի աշխատակազմից, մտահոգություն է հայտնել Հայաստանին ռուսական սպառազինության մատակարարման կապակցությամբ:
Ադրբեջանական թերթրը գրել են, որ Ռուսաստանը Կասպից ծովով եւ Իրանով ռազմական ինքնաթիռներով Հայաստանին է մատակարարել Կրասնուխա եւ Ավտոբազա ռադիոէլեկտրոնային պայքարի միջոցներ:
Ըստ երեւույթին, Տավուշում Ադրբեջանն ու Թուրքիան լուրջ սադրանք էին ծրագրել, որը հայկական ուժերը ժամանակին կանխել են: Դատելով նրանից, որ գործի են դրվել դրոններ, իսկ այն ժամանակվա արտգործնախարար Մամեդյարովը եվրոպական կառույցներին զգուշացրել էր «Հայաստանի կողմից ռեգիոնալ հաղորդակցություններին սպառնալիքի» մասին, անօդաչու սարքերը պետք է վնասեին հաղորդակցությունները ու դրանում մեղադրեին Հայաստանին:
Բայց հայկական ուժերը կարողացան ոչ միայն խփել դրոնները, այլ նաեւ իջեցնել առանց վնասելու: Որոշ տվյալներով, դա կարող է անել հայկական հատուկ ստորաբաժանումը, որը մասնագիտացած է հակադրոնային պայքարում:
Թուրքիան ու Ադրբեջանը չեն համարձակվում խոստովանել, որ հայկական ուժերը կարողացել են կանխել սադրանքը եւ փորձում են սլաքներն ուղղել Ռուսաստանի ուղղությամբ:
