Եւրոպական Յանձնաժողովի Նախագահը Թուրքիան Կը Զգուշացնէ «Իր Դրացիները Ահաբեկելէ»
17 ՍԵՊՏԵՄԲԵՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ԵԿՈՒՈՐ ՔՈՉՈՒՈՐ ԹՈՒՐՔԵՐԸ ԵՒ ԱՇԽԱՐՀԸ:
Եւրոպական յանձնաժողովի նախագահ Ուրսուլա Վոն տեր Լէյըն Թուրքիան զգուշացուց բնական կազի աղբիւրներու շուրջ տագնապի ծիրին մէջ իր դրացիները «ահաբեկելէ»:
Վոն տեր Լէյըն Եւրոպական խորհրդարանին առջեւ Եւրոպական Միութեան կացութեան վերաբերեալ իր տարեկան խօսքին մէջ վերահաստատեց Եւրոպական Միութեան ամբողջական զօրակցութիւնը Յունաստանին ու Կիպրոսին` արեւելեան Միջերկրականի մէջ Թուրքիոյ հետ իրենց տարակարծութեան մէջ:
Ան նշեց, որ Թուրքիան գաղթականները հիւրընկալելու համար դրամական մեծ օժանդակութիւններ կը ստանայ:
«Թուրքիան կարեւոր դրացի է եւ այդպէս պիտի մնայ, սակայն հակառակ աշխարհագրականօրէն մօտիկ ըլլալուն, մեզ բաժնող հեռաւորութիւնը կը թուի, թէ կը շարունակէ մեծնալ», ըսաւ ան:
«Այո՛, Թուրքիան կը գտնուի շրջանի մը մէջ, ուր վերիվայրումներ կան: Այո՛, ան միլիոնաւոր գաղթականներ կը հիւրընկալէ, եւ մենք զանոնք հիւրընկալելու համար դրամական մեծ օժանդակութիւն կը յատկացնենք, սակայն ոչինչ կ՛արդարացնէ իր դրացիները ահաբեկելու փորձերը», ըսաւ Վոն տեր Լէյըն:
«(Եւրոպական Միութեան) անդամ երկու պետութիւններ Կիպրոսն ու Յունաստանը կրնան Եւրոպայի ամբողջական զօրակցութեան վստահիլ` պաշտպանելու համար իրենց գերիշխանական օրինական իրաւունքները», յայտարարեց Եւրոպական յանձնաժողովի նախագահը:
«Արեւելեան Միջերկրականի մէջ այս լարուածութեան մեղմացումը փոխադարձ շահ է: Եւ ուղին, զոր պէտք է անցնիլ, մէկ է, եւ կը պահանջէ ետ կանգնիլ միակողմանի քայլերէ եւ բարի կամեցողութեամբ վերսկսիլ բանակցութիւնները, որովհետեւ այդ է կայունութեան եւ մնայուն լուծումներու առաջնորդող ուղին», նշեց ան:
aztagdaily.com/archives/483517
