Հայ-ադրբեջանական սահմանին ոչ ամբողջ երկայնքով նկատվում է լարվածություն
27 Սեպտեմբեր, 2020
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ։ Հայ-ադրբեջանական սահմանի ոչ ամբողջ երկայնքով նկատվում է լարվածություն․ հարվածներ են եղել Վարդենիսի ուղղությամբ
«Արմենպրես»-ի հաղորդմամբ՝ այս մասին ասուլիսում հայտնեց Միասնական տեղեկատվական կենտրոնի պաշտոնական ներկայացուցիչ Արծրուն Հովհաննիսյանը:
«Այսօր առավոտյան ադրբեջանական ԶՈւ հրթիռահրետակոծության գործողությունների ընթացքում, որոնք հիմնականում եղել են Արցախի ուղղությամբ՝ նաև եղել են հարվածներ ՀՀ Գեղարքունիքի մարզի Վարդենիսի ուղղությամբ»,- ասաց Հովհաննիսյանը և հավելեց, որ գործողությունները հայ-ադրբեջանական սահմանին այդքան էլ ինտենսիվ չեն։
Նրա խոսքով՝ այս պահին ՀՀ-ի այլ մասում նման իրավիճակ չկա։
Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվում են նաև խաղաղ բնակավայրերը, այդ թվում մայրաքաղաք Ստեփանակերտը: Ադրբեջանական զինուժը կորցրել է 2 ուղղաթիռ, 14 ԱԹՍ, ունի զրահատեխնիկայի կորուստներ: Ադրբեջանի հարձակման հետևանքով Մարտունու շրջանում մեկ կին և մեկ երեխա են զոհվել: Քաղաքացիական անձանց շրջանում կան տասնյակ վիրավորներ տարբեր աստիճանի մարմնական վնասվածքներով։ Հակառակորդը հրետակոծել է նաև դպրոցներ, ներառյալ Ստեփանակերտում։
Հայաստանի Հանրապետությունում հայտարարվել է ռազմական դրություն և ընդհանուր զորահավաք։
Լիլիթ Դեմուրյան
armenpress.am/arm/news/1029000.html
