Վարչապետ Փաշինեանի Ուղերձը. «Թշնամին Պէտք Է Հասկանայ, Որ Արցախի Թիկունքին Կանգնած Է Համայն Հայութիւնը»
28 ՍԵՊՏԵՄԲԵՐ 2020 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ԵԿՈՒՈՐ ՔՈՉՈՒՈՐ ԹՈՒՐՔԵՐԸ ԵՒ ՄԵՆՔ ՀԱՅԵՐՍ:
Հայաստանի վարչապետ Նիկոլ Փաշինեան 27 սեպտեմբերի կէսօրին ուղերձ յղեց հայ ժողովուրդին՝ անդրադառնալով Ազրպէյճանի կողմէ սանձազերծուած յարձակումին եւ հաստատելով, որ հայութիւնը ամբողջութեամբ Արցախի կողքին է։ Ստորեւ՝ ուղերձը.-
«Այսօր վաղ առաւօտից Արցախի Հանրապետութիւնը ենթարկուել է ազրպէյճանական զինուած ուժերի յարձակումին:
Ռմբակոծութեան են ենթարկւում Արցախի խաղաղ բնակչութիւնը, մայրաքաղաք Ստեփանակերտը, Արցախի Հանրապետութեան քաղաքացիական ենթակառուցուածքները: Այս պահի դրութեամբ կան արդէն զոհեր եւ վիրաւորներ, այդ թւում՝ խաղաղ բնակչութեան շրջանում:
Օգտագործելով ծանր սպառազինութիւն, հրետանի, հետեւակ՝ հակառակորդը գրոհի է ենթարկում պաշտպանութեան բանակի դիրքերը՝ բոլոր ուղղութիւններով: Պաշտպանութեան բանակը այս պահի դրութեամբ յամառ մարտեր է մղում եւ պատուով է կատարում Արցախը պաշտպանելու իր խնդիրը՝ ձեռնարկելով իրավիճակից բխող գործողութիւններ:
Սիրելի՛ ժողովուրդ,
Իլհամ Ալիեւի բռնատիրական վարչակազմը վերստին անցել է պատերազմական գործողութիւնների: Դա հայ ժողովրդին յայտարարուած պատերազմ է: Դա պատերազմ է մեր անկախութեան, ազատութեան եւ արժանապատուութեան դէմ:
Հայ ժողովուրդը պատրաստ է այդ պատերազմին: Քանզի միշտ սթափ գիտակցել է, որ հայատեացութիւնը, թշնամանքը եւ ատելութիւնը, որով տասնամեակներ ի վեր ազրպէյճանական բռնապետութիւնը սնում է իր ժողովրդին, չէր կարող որեւէ այլ արդիւնքի յանգեցնել, քան պատերազմը: Ազրպէյճանի բռնապետութիւնն իր իսկ վարած հակահայկական քաղաքականութեան պատանդն է դարձել եւ այսօր փորձում է արդարացնել իր իսկ որդեգրած քարոզչական խոստումները՝ Ղարաբաղեան հակամարտութիւնը ռազմական միջոցներով լուծելու մասին:
Հայ ժողովուրդը պատրաստ է արժանի հակահարուած հասցնել թշնամուն: Հայաստանի Հանրապետութիւնը Արցախի Հանրապետութեան անվտանգութեան եւ անկախութեան երաշխաւորն է: Եւ Հայաստանի Հանրապետութիւնը իր բնակչութեան ու պետական համակարգի ողջ ներուժով այսօր կանգնած է Արցախի թիկունքին: Մենք գործադրելու ենք հնարաւոր եւ անհնարին ամէն ջանք մեր հայրենիքի սահմանները անառիկ պահելու, մեր ազատութիւնն ու անկախութիւնը պաշտպանելու համար: Որպէս 1994թ. հրադադարի համաձայնագիրը ստորագրած կողմ՝ Հայաստանի Հանրապետութիւնը քաղաքական, դիւանագիտական եւ ռազմական հարթակներում ձեռնարկելու է անհրաժեշտ գործողութիւններ՝ ԼՂ ժողովրդի ֆիզիքական անվտանգութիւնը ապահովելու եւ հակառակորդին խաղաղութիւն պարտադրելու նպատակով։
Այս պահի դրութեամբ հակառակորդն արդէն իսկ կրում է մարդկային եւ զինտեքնիկայի զգալի կորուստներ: Ազրպէյճանը պէտք է քաջ գիտակցի, որ մեր բանակի մարտունակութիւնն այսօր բարձր է, քան երբեւէ: Թշնամին պէտք է հասկանայ, որ Արցախի թիկունքին այսօր կանգնած է համայն հայութիւնը:
Մենք միասնական ենք ինչպէս միշտ: Մենք միասնական ենք, ինչպէս եղել ենք մեր պատմութեան վճռորոշ բոլոր պահերին, երբ ոսոխը սպառնացել է մեր գոյութեանը, մեր ինքնութեանն ու արժէքներին: Ազրպէյճանի բռնապետ իշխանութիւնները պէտք է հասկանան, որ անհնարին է ծնկի բերել հայ ժողովրդին: Մենք մեր հազարամեայ պատմութեան ընթացքում ունեցել ենք բազմաթիւ վճռորոշ պահեր եւ յաղթահարել բազում դժուարութիւններ: Մեր գործն արդար է եւ այս յանցաւոր ոտնձգութիւնը եւս արժանի հակահարուած կը ստանայ:
Մենք լաւ գիտակցում ենք, որ ազրպէյճանական բռնապետութիւնը ռազմական գործողութիւններ կարող է սկսել նաեւ Հայաստանի Հանրապետութեան սահմանների ուղղութեամբ ու դիմել տարբեր սադրանքների՝ տարածաշրջանում իրավիճակն ամբողջովին ապակայունացնելու համար: Այս է պատճառը, որ կառավարութեան որոշմամբ Հայաստանի Հանրապետութիւնում յայտարարուել է ռազմական դրութիւն եւ ընդհանուր զօրահաւաք:
ԵԱՀԿ Մինսքի խմբի համանախագահ պետութիւնների եւ միջազգային ողջ հանրութեան ուշադրութիւնը հրաւիրում եմ իրավիճակի լրջութեան վրայ: Հարաւային Կովկասում լայնածաւալ պատերազմի բռնկումը, որի շեմին մենք հիմա կանգնած ենք, կարող է ամենաանկանխատեսելի հետեւանքներն ունենալ: Այն կարող է դուրս գալ տարածաշրջանի սահմաններից եւ ձեռք բերել շատ աւելի լայն մասշտաբներ՝ սպառնալով միջազգային անվտանգութեանն ու կայունութեանը:
Միջազգային հանրութեանը կոչ եմ անում՝ գործադրել ազդեցութեան բոլոր լծակները՝ զերծ պահելու Թուրքիային հնարաւոր բոլոր միջամտութիւններից, ինչը վերջնականապէս կ’ապակայունացնի իրավիճակը տարածաշրջանում: Թուրքիայի յարձակողական վարքագիծը, որը խիստ վտանգաւոր դրսեւորում ունեցաւ յատկապէս յուլիսեան դէպքերի ժամանակ եւ շարունակւում է այսօր, լուրջ մտահոգութեան տեղիք է տալիս: Թուրքիայի նման վտանգաւոր կեցուածքի պահպանումը ամենակործանարար հետեւանքներով է յղի Հարաւային Կովկասի եւ յարակից տարածաշրջանների համար: Միջազգային հանրութիւնը պէտք է միասնական ջանքերով կանխի դէպքերի վտանգաւոր զարգացումը եւ տարածաշրջանը զերծ պահի ապակայունացնելու բոլոր փորձերից:
Սիրելի՛ հայրենակիցներ,
Այսօր մենք կանգնած ենք լուրջ վտանգի առաջ: Իրավիճակը աւելի է բարդանում համավարակի պայմաններում: Ուստի պահի լրջութիւնը պահանջում է մեր բոլորի զգօնութիւնը: Մեր յաղթանակը կախուած է մեզնից իւրաքանչիւրի անհատական եւ մեր միասնական, հաւաքական ջանքից եւ պահուածքից:
Կոչ եմ անում բոլորին ցուցաբերել բարձրագոյն աստիճանի կարգապահութիւն եւ բարձր քաղաքացիական գիտակցութիւն: Եւ մենք կը յաղթենք:
Եւ ուրեմն՝
Կեցցէ ազատութիւնը,
Կեցցէ Հայաստանի Հանրապետութիւնը,
Կեցցէ Արցախի Հանրապետութիւնը,
Կեցցենք մենք եւ մեր երեխաները, որ ապրելու ենք ազատ եւ երջանիկ Հայաստանում, ազատ եւ երջանիկ Արցախում:
Փառք հայոց բանակին:
Յաւերժ փառք հայ զինուորին»:
