ՊԲ-ն բարելավել է իր դիրքերը և հող նախապատրաստել հետագա առաջխաղացման համար. Արցախի նախագահ
4 Հոկտեմբեր, 2020
ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ։ Արցախի Պաշտպանության բանակն այսօր բարելավել է իր դիրքերը և հող նախապատրաստել հետագա առաջխաղացման համար։ «Արմենպրես»-ի փոխանցմամբ` այս մասին «Ֆեյսբուք»-ի իր էջում գրել է առաջնագծում գտնվող Արցախի նախագահ Արայիկ Հարությունյանը։
«Սիրելի՛ հայրենակիցներ, շարունակում եմ մնալ առաջնագծում և կանգնել մեր հերոս տղաների կողքին: Նրանք մեծ սխրանքներ են կատարում Հայրենիքի ու բոլորիս ընտանիքների պաշտպանության ապահովման ճանապարհին»,- գրել է Հարությունյանը։
Արցախի նախագահը նշել է, որ զուգահեռաբար իրականացնում է Հանրապետության օպերատիվ կառավարումը՝ ներդրված համապատասխան մեխանիզմների միջոցով:
«Ծանր մարտերից հետո Պաշտպանության բանակն այսօր բարելավել է իր դիրքերը և հող նախապատրաստել հետագա առաջխաղացման համար: Նեղն ընկնելով առաջնագծում՝ Ադրբեջանը սկսել է ավելի ուժգին հարվածներ հասցնել մեր խաղաղ բնակավայրերին՝ նաև հեռահար հրթիռների կիրառմամբ:
Այդ ռազմական հանցագործությունները ստանալու են իրենց համարժեք պատասխանները, և այս առումով վերջին անգամ ենք զգուշացնում Ադրբեջանի իշխանություններին…»,- նշել է Հարությունյանը։
Արցախի նախագահը հավելել է` հաղթելու և պատժելու ենք մեր գոյությանը սպառնացող հանցագործներին:
armenpress.am/arm/news/1030219.html
