Երեւանը Իսրայէլին Յորդորած է Զէնք Չմատակարարել Ազրպէյճանին
05 ՀՈԿՏԵՄԲԵՐ 2020 –
Հայաստանի նախագահ Արմէն Սարգսեան այսօր հեռախօսազրոյցի ընթացքին Իսրայէլի նախագահ Ռիւուեն Ռիւլինին յորդորած է օգտագործել ազդեցութիւնը իր երկրի կառավարութեան վրայ` անյապաղ դադրեցնելու զէնքի մատակարարումները Ազրպէյճանին:
Արմէն Սարգսեան նշած է, որ Իսրայէլի կողմէ Ազրպէյճանին վաճառուող զէնք-զինամթերքը ոչ միայն պաշտպանական նպատակներով կ՛օգտագործուի, ինչպէս նախապէս կը հաւաստիացնէր իսրայէլական կողմը, այլեւ` յարձակողական:
«Այդ զինատեսակները լայնօրէն կը կիրառուին հայկական բնակավայրերը հրետակոծելու նպատակով եւ քաղաքացիական խաղաղ բնակչութեան դէմ` յանգեցնելով մարդկային բազմաթիւ զոհեր ու հսկայական աւերածութիւններ», – ըսած է նախագահ Սարգսեան:
Հայաստանի նախագահը ընդգծած է, որ զէնքի մատակարարումը լրջօրէն կրնայ վտանգել հայ-իսրայէլական յարաբերութիւնները:
Ռիւուեն Ռիւլին պատրաստակամութիւն յայտնած է կառավարութեան հետ ամենայն ուշադրութեամբ ուսումնասիրել հայկական կողմի բարձրացուցած հարցերը:
yerakouyn.com/2020/10/05/երեւանը-իսրայէլին-յորդորած-է-զէնք-չմա/
