ԵՐԵՒԱՆ, «Հայերն Այսօր».– Վատիկանի մօտ Հայաստանի դեսպանութեան նախաձեռնութեամբ, 21 Նոյեմբերին Հռոմի Սանթա Մարիա Մաժորիթի եկեղեցւոյ Քահանայապետական արեւելագիտութեան հիմնարկին մէջ տեղի ունեցած է հիմնարկի փրոֆեսէօր հայր Ճորճ Հանրի Ռոյսենի բացառիկ եօթնհատորեակի շնորհահանդէսը:
Ներկայ էին Քահանայապետական արեւելագիտութեան հիմնարկի նախագահ Տաւիտ Նազար, Սանթ Էճի-տիօ համայնքի հիմնադիր Անտրէա Ռիքարտի եւ Սանթ Էճիտիօ համայնքի նախագահ Մարքօ Իմփալիացցօ, Հայ առաքելական եւ կաթողիկէ եկեղեցւոյ հոգեւոր հայրեր, հասարակական-քաղաքական հատուածի ներկայացուցիչներ եւ իտալահայ գաղութի անդամներ: Այս մասին կը յայտնեն Հայաստանի արտաքին գործոց նախարարութեան մամլոյ ծառայութենէն։
Գիրքին մէջ կը ներկայացուին Վատիկանի փակ արխիւներուն մէջ գտնուող ու Հայոց Ցեղասպանութեան վերաբերող բոլոր փաստաթուղթերը՝ համիտեան ջարդերէն մինչեւ յետ-Ցեղասպանական՝ քեմալական կառավարման շրջանի տարիներ, ինչ որ կարելիութիւն կու տայ ամբողջական պատկերացում կազմելու ոճրագործութեան բոլոր հանգրուաններուն մասին՝ ցեղասպանութեան նախապատրաստութենէն մինչեւ գործադրութիւն։
Ձեռնարկին ընթացքին խօսք առած է Սուրբ Աթոռի մէջ Հայաստանի դեսպան Միքայէլ Մինասեան, որ իր խօսքին մէջ յատկապէս նշած է, որ եօթնհատորեակը ցեղասպանագիտութեան ոլորտին մէջ լրջագոյն ձեռքբերում է եւ պատմութիւն, որ նաեւ թուրքերունն է: «Հայր Ռոյսէնի աշխատանքը մեզ օգնում է յարաբերուել փաստերի հետ: Այն մեզ օգնում է ընթերցել անցեալը՝ դասեր քաղելով ապագայի համար», յայտնած է ան:
Այս առիթով դեսպան Մինասեան հայր Ճորճ Հանրի Ռոյսէնին յանձնած է Հայաստանի նախագահին կողմէ շնորհուած պատուոյ շքանշանը՝ հայագիտութեան զարգացման եւ հոգեւոր արժէքներու տարածման առումով ունեցած նշանակալի աւանդին համար:
ԱԶԱՏ ԽՕՍՔ
Ազատ Խօսք – Ելեկտրոնային Անկախ Պարբերաթերթ
կայք էջ : www.azadkhosk.com
Խմբագիր – Երան Գույումճեան
Թիւ (53) Դեկտեմբեր 2015
