«Արցախեան Պատերազմին Մէջ Մենք Պէտք Էր Հայաստանին Աջակցէինք» Կ՛ըսէ Իրանի Խորհրդարանի Երեսփոխանը
15 ԴԵԿՏԵՄԲԵՐ 2020 – ՏԱՐԱԾԱՇՐՋԱՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – ԱՇԽԱՐՀ:
Իրանի խորհրդարանի անդամ Ահմատի Պիղաշ խորհրդարանական նիստի ընթացքին իր արտասանած խօսքին մէջ անդրադարձած է արցախեան պատերազմին, Թուրքիոյ վարած արտաքին քաղաքականութեան ու քննադատած Թուրքիոյ նախագահ Ռեճեփ Թայիփ Էրտողանը: Այս մասին կը հաղորդէ «Իրան Ինթըրնեշընըլ»-ը:
Իրանցի երեսփոխանը իր խօսքին մէջ նշած է, թէ իրանցի հիւլէական գիտնականներուն դէմ կատարուած մահափորձերը նաեւ Էրտողանի վարած քաղաքականութեան արդիւնքն են:
«Մեր գիտնականներու սպանութիւններուն մէջ Իսրայէլի վարչապետ Նեթանիահուէն պակաս չէ նաեւ Էրտողանի դերը», ըսած է ան:
Իրանեան խորհրդարանի անդամը իր խօսքին մէջ անդրադարձած է նաեւ արցախեան վերջին պատերազմին եւ կարծիք յայտնած, որ ուժերու հաւասարակշռութիւնը պահպանելու համար Իրան պէտք էր Հայաստանին աջակցէր` նոյն ատեն հետեւողականօրէն լսելով Գերագոյն հոգեւոր պետ այաթոլլա Ալի Խամենէիի խօսքերը. «Շրջափակուած տարածքները պէտք է ազատուին»:
aztagdaily.com/archives/493102
