Պարոն Էրտողան, Դուն Իրապէս Պատրա՞ս Ես Առերեսուելու Այդ Դիմանկարի Պատմութեան Հետ. Փայլանի Արձագանգը Էրտողանին
27 ՅՈՒՆՈՒԱՐ 2021 – ԹՈՒՐՔԻԱ – ՆԵՐՔԻՆ ՔԱՂԱՔԱԿԱՆՈՒԹԻՒՆ:
Թուրքիոյ նախագահ Ռեճեփ Թայիփ Էրտողանը այսպէս կոչուած՝ ազատագրական շարժման Արեւելեան ճակատի հրամանատար, 1920թ. թուրք-հայկական պատերազմին թրքական զօրքերու հրամանատար Քազըմ Քարապեքիր փաշայի մահուան տարելիցին առիթով գրառում կատարած է հասարակական ցանցի իր էջերուն մէջ:
Ըստ Ermenihaber.am-ի՝ Էրտողանը գրառման կից հրապարակած է Քազըմ Քարապեքիր փաշայի դիմանկարը՝ հռետորական հարց հնչեցնելով, թէ արդեօքք մարդիկ գիտե՞ն այդ նկարին պատմութիւնը:
Այնուհետեւ Էրտողանը նշած է, թէ իբր Քարապեքիր փաշան «երեխաներուն կարեկցող, անտուն մանուկները պաշտպանող, մեծահոգի պետական այր էր»:
Անոր խօսքով՝ Քարապեքիրը «որբերու հայրն էր», որ «Անատոլիոյ» մէջ (Արեւմտեան Հայաստան-խմբ.) իր հոգածութեան տակ վերցուցած էր 6000 երեխայ եւ անոնց բոլոր ծախսերը:
Անդրադառնալով դիմանկարի պատմութեան՝ Թուրքիոյ նախագահը նշած է, որ անիկա Քարապեքիրին նուիրած էին Տրապիզոնի որբերը, որոնք կը գտնուէին փաշայի հովանիին ներքոյ:
Էրտողանը ապաշուք թուրք զօրավարի «երախտիքը» եւս մէկ անգամ ի ցոյց դնելու համար գրած է.
«Դիմանկարին տակ եղած գրութիւնը մէկ անգամ եւս մեզի ցոյց կու տայ, թէ որքան բարի եւ որքան մեծահոգի եղած է մեր նախնին.
Որբերու մեծարգոյ հայր հերոս Քազըմ Քարապեքիր փաշային… Տրապիզոնի հայ որբերուն կողմէ… Ռումի 1922թ. Սեպտեմբեր 9»:
Նշենք, որ դիմանկարին տակ եղած գրութիւնը օսմաներէն է:
Թուրքիոյ նախագահի այս գրառման արձագանգած է այդ երկրի խորհրդարանի հայ պատգամաւոր, ընդդիմադիր քրտամէտ «Ժողովուրդներու դեմոկրատական կուսակցութեան» (ԺԴԿ-HDP) անդամ Կարօ Փայլանը:
Փայլան մասնաւորապէս գրած է.
«Այսպէս կոչուած այդ դիմանկարին պատմութիւնը գիտե՞ս, պարոն Էրտողան: Այդ երեխաները որբացած են, քանի որ հայ ժողովուրդին դէմ իրականացուած ցեղասպանութեան ժամանակ իրենց ընտանիքները կոտորուած են: Պարոն Էրտողան, դուն իսկապէս պատրա՞ստ ես առերեսուելու այդ դիմանկարի պատմութեան հետ»:
թուրք-հայկական պատերազմին թրքական զօրքերու հրամանատար Քազըմ Քարապեքիր փաշայ
Yerakouyn.com/2021/01/27/պարոն-էրտողան-դուն-իրապէս-պատրա՞ս-ես-ա/
