Ալիեւ. «Լեռնային Ղարաբաղի Տագնապը Աւարտած Է. «Տնտեսական Համագործակցութեան Կազմակերպութեան Անդամ Պետութիւնները Կը Հրաւիրենք Զանգեզուրի Միջանցքը Շահագործելու»
06 ՄԱՐՏ 2021 – ԵՐԿԻՐ ՀԱՅԱՍՏԱՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ազրպէյճանի նախագահ Իլհամ Ալիեւ ըսած է, որ Պաքուն, Անգարան եւ Թեհրանը մտադիր են միացեալ ջանքերով զարգացնել շրջանային փոխադրամիջոցային նախագիծերը, եւ այդ հոլովոյթէն Երեւանը եւս կրնայ օգուտ քաղել: Այս մասին կը հաղորդէ ազրպէյճանական «Մինվալ» կայքը:
«Ազրպէյճանը, Թուրքիան եւ Իրանը հասարակաց դիրքորոշում ունին շրջանին մէջ փոխադրամիջոցային նախագիծերու իրականացման հարցին մէջ: Եթէ Հայաստանը ինքզինք բնական պահէ, կրնայ օգուտ քաղել այս հոլովոյթէն», Տնտեսական համագործակցութեան կազմակերպութեան հինգշաբթի օր կայացած վեհաժողովի ընթացքին ըսած է Ալիեւ:
Ան նշած է, որ ղարաբաղեան երկրորդ պատերազմը աւարտած է` տագնապը ձգելով անցեալին մէջ:
«Ինչպէս արդէն ըսի, Լեռնային Ղարաբաղի տագնապը աւարտած է Հայաստանի նկատմամբ Ազրպէյճանի փառահեղ յաղթանակով: Լեռնային Ղարաբաղի տագնապը անցեալին մէջ է: Հիմա մենք կը մտածենք ապագային մասին: Մենք սկսած ենք քննարկել այնպիսի փոխադրամիջոցային նախագիծեր, որոնք շրջանին մէջ խաղաղութիւն եւ կայունութիւն ապահովելու համար բազմաթիւ երկիրներ կը միաւորեն», ընդգծած է Ալիեւ:
Ան աւելցուցած է, որ 9 նոյեմբեր 2020-ին ստորագրուած եռակողմ յայտարարութեամբ կը նախատեսուի կառուցել փոխադրամիջոցային միջանցք, որ Ազրպէյճանը պիտի կապէ Նախիջեւանի Ինքնավար Հանրապետութեան եւ Թուրքիոյ, ինչ որ նոր կարելիութիւններ կը ստեղծէ:
Ալիեւ Տնտեսական համագործակցութեան կազմակերպութեան անդամ երկիրներուն կոչ ուղղած է միանալու նախագիծին: «Ես պիտի ուզէի նշել, որ նոր միջանցքը, որ պիտի անցնի Ազրպէյճանի պատմական տարածքէն` Զանգեզուրէն, եւ Ազրպէյճանի հիմնական մասը պիտի կապէ Նախիջեւանի Ինքնավար Հանրապետութեան եւ Թուրքիոյ հետ, փոխադրամիջոցային ոլորտին մէջ նոր կարելիութիւններ պիտի ստեղծէ: Մենք կը հրաւիրենք Տնտեսական համագործակցութեան կազմակերպութեան անդամ պետութիւնները Զանգեզուրի միջանցքը շահագործելու»:
www.aztagdaily.com/archives/501459
