Վախճանեցաւ Տանն Կիլիկիոյ Կաթողիկէ Հայոց Գրիգոր Պետրոս Ի. Կաթողիկոս Պատրիարքը
25 ՄԱՅԻՍ 2021 – ԳԱՂՈՒԹՆԵՐ – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – Կարդալ նաեւ՝:
Հիւսիսային Ամերիկայի Կաթողիկէ Հայոց թեմը կը գուժէ Տանն Կիլիկիոյ Կաթողիկէ Հայոց Գրիգոր Պետրոս Ի. կաթողիկոս պատրիարքին մահը, որ պատահեցաւ Երեքշաբթի, 25 Մայիսին, Հայ կաթողիկէ պատրիարքարանին մէջ՝ Պէյրութ:
Երջանկայիշատակ կաթողիկոսին թաղման կարգը եւ յուղարկաւորութիւնը պիտի կատարուին Շաբաթ, 29 Մայիսին, եւ մարմինը պիտի ամփոփուի Զմմառու կաթողիկոս պատրիարքներու դամբարանին մէջ:
Երջանկայիշատակ պատրիարքը 87 տարեկան էր։
Ստորեւ կու տանք Գրիգոր Պետրոս Ի. Կապրոյեան կաթողիկոս պատրիարքին հակիրճ կենսագրականը, առնուած Վատիկանի ձայնասփիւռի հայկական բաժինի կայքէն․
Ծնած է Հալէպ, 15 Նոյեմբեր 1934ին, տասներորդը 12 զաւակներով ընտանիքի մը: Ծնողքը ապաստանած էին Հալէպ, Մարտին քաղաքի ջարդերէն ետք: Ընտանիքը վերջնականապէս կը հաստատուի Լիբանան 1938ին:
Ան Կը մտնէ Զմմառու պատրիարքական կղերի միաբանութեան փոքր ընծայարանը, ապա կը յաճախէ Մարիստ Ֆրերներու վարժարանը:
Պաքալորէեան առնելէ ետք կ՛ուղարկուի Քահանայապետական Լեւոնեան Հայ վարժարանը, Հռոմ եւ վեց տարի կը յաճախէ Քահանայապետական Գրիգորեան համալսարանը, ստանալով սքոլասթիք փիլիսոփայութեան պաքալորէեան եւ աստուածաբանութեան վկայականը:
Ան Կը վերադառնայ Լիբանան, ուր կը ձեռնադրուի Զմմառու միաբան կուսակրօն վարդապետ 28 Մարտ 1959ին: Մէկ տարի պաշտօնավարելէ ետք, Ճունիի մէջ՝ իբրեւ փոխտեսուչ փոքր ընծայարանին՝ կը նշանակուի տնօրէն Պուրճ Համուտի Մեսրոպեան Հայ կաթողիկէ վարժարանին. Ան այդ պաշտօնը կը վարէ 9 տարիներ:
3 Յունուար 1977ին՝ Պօղոս Զ. պապը զայն կ՛անուանէ տիտղոսաւոր եպիսկոպոս Ամիտայի (Տիգրանակերտ) հայոց: Եպիսկոպոս կ՛օծուի 13 Փետրուար 1977ին, Պուրճ Համուտի Սուրբ Փրկիչ եկեղեցւոյ մէջ:
20 Յունիս 1986ին, Յովհաննէս Պօղոս Բ. պապը կը ստեղծէ Փարիզի Սուրբ Խաչ թեմը, Ֆրանսայի հայ կաթողիկէներուն համար եւ զայն կ՛անուանէ առաջին եպիսկոպոսը այդ թեմին: 15 Հոկտեմբեր 1988ին ան կը նշանակուի Առաքելական այցելու Արեւմտեան Եւրոպայի հայոց, որոնք զուրկ էին տեղական առաջնորդէ:
1997ին կ՛աւարտէ «Քրիստոնէական Կաթողիկէ Եկեղեցւոյ» արեւմտահայերէն թարգմանութեան հրատարակութիւնը, որուն թարգմանութիւնը եւ տպագրութիւնը վարած էր ան:
2005ին եւ 2009ին կը կազմակերպէ Հռոմի եւ Լիբանանի մէջ, այժմ Ընդհանրական եկեղեցւոյ վարդապետ՝ սուրբ Գրիգոր Նարեկացիի նուիրուած երկու գիտաժողովներ, որոնց ընթացքին ներկայացուած նիւթերուն հրատարակութիւններն ալ կը հոգայ:
1997էն 2014 կը վարէ Հռոմի Քահանայապետական Լեւոնեան Հայ վարժարանի ընդհանուր մատակարարի պաշտօնը: 7 Ապրիլ 2013ին, երբ կը հաստատուի իր յաջորդը՝ Յովհաննէս եպս․ Թէյրուզեան, իբրեւ թեմին առաջնորդ, ան կը դառնայ վաստակաւոր եպիսկոպոս Ֆրանսայի թեմին:
-25 Յունիս 2015ին, յետ մահու, երջանկայիշատակ Ներսէս Պետրոս ԺԹ. պատրիարքին, ան դարձաւ պատրիարքական կառավարիչ Հայ Կաթողիկէ եկեղեցւոյ:
– 25 Յուլիս 2015ին Հայ Կաթողիկէ պատրիարքական եկեղեցւոյ սիւնհոդոսական հայրերը զինք կ՛ընտրեն 20րդ կաթողիկոս պատրիարք Տանն Կիլիկիոյ Կաթողիկէ Հայոց եւ ան կ՛առնէ Գրիգոր Պետրոս Ի. անունը:
asbarez.com/arm/390133/վախճանեցաւ-տանն-կիլիկիոյ-կաթողիկէ-հա/
