Թալեպանները Թուրքիայէն Կը Պահանջեն ՕԹԱՆ-ի Անդամ Միւս Երկիրներուն Նման Իր Ուժերը Հեռացնել Աֆղանիստանէն
13 ՅՈՒԼԻՍ 2021 – ԿԻԶԱԿԷՏ – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – Կարդալ նաեւ՝:
Թալեպան շարժումի բանբեր Սուհէյլ Շահին նշեց. «Թուրքիան պէտք է իր ուժերը ԱՖղանիստանէն հեռացնէ Միացեալ Նահանգներու հետ 29 փետրուարին մեր ստորագրած համաձայնութեան հիմամբ, եւ նկատի ունենալով, որ անիկա ՕԹԱՆ-ի անդամ է»: Այս մասին հաղորդեց աֆղանական «Թոլօ նիուզ» պատկերասփիւռի կայանը:
«Նկատի ունենալով, որ Թուրքիան իսլամական մեծ պետութիւն է, ապա ԱՖղանիստան անոր հետ պատմական յարաբերութիւններ ունի, եւ կը յուսանք ապագային մեր երկրին մէջ իսլամական նոր կառավարութեան կազմութենէն ետք անոր հետ սերտ ու լաւ յարաբերութիւններ ունենալ», նշեց ան:
Թալեպան շարժումը այդպիսով մեկնաբանեց Թուրքիոյ` ՕԹԱՆ-ի ուժերուն ԱՖղանիստանէն հեռացումէն ետք Քապուլի օդակայանի անվտանգութիւնը ապահովելու առաջարկը:
Ըստ «Ռոյթըրզ» լրատու գործակալութեան, Անգարա այս առաջարկը Ուաշինկթընին տրամադրած էր մայիսին ՕԹԱՆ-ի անդամ երկիրներու պաշտպանութեան նախարարներու ժողովի ընթացքին, երբ Միացեալ Նահանգներն ու անոնց դաշնակիցները ԱՖղանիստանէն իրենց ուժերու հեռացման ծրագիրը քննարկեցին:
Կը նախատեսուի, որ թրքական առաջարկին շուրջ քննարկումները շարունակուին այս շաբաթ ՕԹԱՆ-ի վեհաժողովի ընթացքին:
www.aztagdaily.com/archives/515728
