«Ֆրանսան Մտահոգ Է Հայաստանի Սահմանային Անվտանգութեան Առնչութեամբ» Կ՛ըսէ Դեսպան Լաքոթ
29 ՅՈՒԼԻՍ 2021 – ԿԻԶԱԿԷՏ – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – Կարդալ նաեւ՝:
«Ամբողջովին տեղեակ եմ, որ Հայաստանի Հանրապետութեան տարածքին մէջ, մասնաւորաբար Գեղարքունիքի մարզին մէջ զինեալ գործողութիւններ տեղի կ՛ունենան: Մենք միտքով զինուորներուն հետ ենք եւ քաջ կը գիտակցինք, որ այս ամէնը տեղի կ՛ունենայ հայ-ազրպէյճանական սահմանի վիճակի շարունակական վատթարացման ծիրին մէջ», յայտարարեց Հայաստանի Հանրապետութեան մէջ Ֆրանսայի արտակարգ եւ լիազօր դեսպան Ժոնաթան Լաքոթ` «Էրեբունի» պատմահնագիտական արգելոց-թանգարանի պեղումներուն նուիրուած մամլոյ ասուլիսի ընթացքին եւ ընդգծեց, որ միտքով նաեւ Գեղարքունիքի մէջ է:
Դեսպանը նշեց, որ այս իրադարձութիւնները կը յառաջացնեն Ֆրանսայի մտահոգութիւնը, որովհետեւ ատով զինադադարը կը խախտուի, ինչի պատճառով Հայաստանի սահմաններու անվտանգային վիճակի վատթարացում կ՛արձանագրուի:
«Ֆրանսան կոչ կ՛ուղղէ վերսկսելու Հայաստանի եւ Ազրպէյճանի միջեւ քաղաքական հոլովոյթին, սակայն միեւնոյն ժամանակ, ատիկա պէտք է ըլլայ արդար ու պէտք չէ տեղի ունենայ ուժի կամ այլ ազդեցութեան տակ», շեշտեց Լաքոթ: Ըստ անոր, Մինսքի խմբակի ծիրին մէջ հաղորդակցութիւններ կան Ֆրանսայի, Ռուսիոյ եւ Միացեալ Նահանգներու միջեւ, որպէսզի նախ եւ առաջ սահմանային լարուածութեան թուլացման ուղղութեամբ ներդրում ունենան, իսկ երբ պահը գայ, ներդրում ունենան նաեւ քաղաքական հոլովոյթին մէջ:
«Այս պահուս մեր հիմնական մտահոգութիւնը Հայաստանի սահմաններուն վիճակն է: Բնականաբար, մեր միտքին մէջ է, եւ մենք չենք մոռնար 9 նոյեմբեր 2020-ին ստորագրուած համաձայնագիրին որոշ կէտերը, որոնց հետ տակաւին խնդիրներ կան, մասնաւորաբար, Ազրպէյճանի մէջ պահուող բոլոր պատերազմական գերիներու ազատ արձակման կէտը», նշեց դեսպանը:
Անդրադառնալով Էմանուէլ Մաքրոնի` Հայաստան սպասուող այցելութեան` դեսպան Լաքոթ նշած է, որ այցելութեան համար յստակ թուական տակաւին չկայ, Ֆրանսայի նախագահը Երեւան պիտի գայ այն ժամանակ, երբ այցելութիւնը օգտակար ըլլայ շրջանին մէջ քաղաքական հոլովոյթներուն աջակցելու համար: «Այդ պահուն ալ պիտի տեսնենք, թէ ի՛նչ կարելի փաստաթուղթ կրնայ ստորագրուիլ Հայաստանի եւ Ֆրանսայի միջեւ», եզրափակած է Ֆրանսայի դեսպանը:
www.aztagdaily.com/archives/517242
ՄԱԿ-ը Մտահոգութիւն Կը Յայտնէ Հայ-Ազրպէյճանական Սահմանին Լարուած Իրավիճակին Առնչութեամբ
Հայաստանի եւ Ազրպէյճանի սահմանին աճող լարուածութիւնը մտահոգութիւն կը յառաջացնէ Միացեալ ազգերու կազմակերպութեան (ՄԱԿ) մօտ: Այս մասին լրագրողներու հետ զրոյցի մը ընթացքին յայտնած է ՄԱԿ-ի ընդհանուր քարտուղարի պաշտօնական ներկայացուցիչի տեղակալ Ֆարհան Հաք` անդրադառնալով 28 յուլիսին Հայաստանի սահմանին ազրպէյճանական կողմի սանձազերծած զինուորական գործողութիւններուն:
«Մենք աճող անհանգստութեամբ կը հետեւինք Հայաստանի եւ Ազրպէյճանի սահմանին լարուած իրավիճակի մասին տեղեկութիւններուն, այդ կարգին նաեւ եւ` վերջին դէպքին, որուն մասին տեղեկութիւն ստացած ենք այսօր: Թէպէտ ՄԱԿ-ը չի կրնար ստուգել այս տեղեկութիւնները, սակայն մենք կոչ կ՛ուղղենք կողմերուն ցուցաբերելու զսպուածութիւն, հրաժարելու որեւէ գործողութիւններէ, որոնք կրնան յանգեցնել լարուածութեան, եւ հարցերը լուծել երկխօսութեան միջոցով», ըսած է Հաք:
www.aztagdaily.com
