Պաշտպանութեան Նախարարը Հրամայեց Ոչնչացնել Սահմանը Հատել Փորձող Ատրպէյճանցիները
05 ՕԳՈՍՏՈՍ 2021 – ԿԻԶԱԿԷՏ – ՀԱՅՈՑ ՑԵՂԱՍՊԱՆՈՒԹԻՒՆ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ – Կարդալ նաեւ՝:
ՌՈՒՍ ՍԱՀՄԱՆԱՊԱՀՆԵՐ ՏԵՂԱԿԱՅՈՒԵՑԱՆ ՏԱՒՈՒՇԻ ՄԷՋ
ԵՐԵՒԱՆ, «Արմէնփրէս».- Հայաստանի պաշտպանութեան նախարար Արշակ Կարապետեան՝ պաշտպանութեան նախարարին կից անձնակազմի 5 Օգոստոսի նիստին հրամայեց ոչնչացնել Հայաստանի սահմանը հատել փորձող ատրպէյճանցի զինուորականները:
Ան հրամայեց անմիջապէս կրակ բանալ եւ որեւէ միջոցով ոչնչացնել ատրպէյճանցի այն զինուորականները, որոնք կը փորձեն հատել Հայաստանի սահմանը: Ընդ որում, նախարարը նաեւ նախազգուշացուց, որ այն հրամանատարները, որոնց վերահսկողութեան տակ գտնուող տարածքին մէջ ատրպէյճանցիները թէկուզ մէկ սանթիմեթր յառաջ երթան` շատ խիստ պիտի պատժուին:
Քննարկուեցան նաեւ ձմրան նախապատրաստական աշխատանքներու ընթացքը: «Պաշտպանական գերատեսչութեան ղեկավարը նիստի մասնակիցներից պահանջել է գործադրել առաւելագոյն ջանք` զինուած ուժերի բարեփոխումները հնարաւորինս արագ եւ արդիւնաւէտ կեանքի կոչելու համար», կը նշուի նախարարութեան հրապարակած հաղորդագրութեան մէջ։
Միւս կողմէ, Տաւուշի մարզին մէջ, մասնաւորաբար` Ոսկեպար համայնքի տարածքին մէջ տեղակայուեցան ռուս սահմանապահներ։
Այս մասին յայտնեց Հայաստանի պաշտպանութեան նախարարութիւնը` արձագանգելով լրատուամիջոցներով շրջան ընող տեղեկութիւններուն։
Կը նշուի, որ շինարարական աշխատանքներ կը կատարուին՝ սահմանապահներուն թիկունքային ապահովութեան շինութիւններու կառուցման նպատակով։
Հայաստանի ռազմական գերատեսչութիւնը կը տեղեկացնէ, որ նշեեալ գործընթացը կ՛իրականացուի հայ-ռուսական համագործակցութեան ծիրին մէջ:
Միւս կողմէ, Ռուսիոյ արտաքին գործոց նախարարութեան տեղեկատուութեան եւ մամլոյ բաժանմունքի փոխտնօրէն Ալեքսանտր Պիքանթով յայտնեց, թէ Ռուսիա լրջօրէն մտահոգ է հայ-ատրպէյճանական սահմանին յաճախակի դարձած միջադէպերով, ցաւ յայտնելով, որ հոն լարուածութիւնը չի նուազիր՝ հակառակ ձեռնարկուող քայլերուն:
Ան դարձեալ կոչ ըրաւ բոլոր կողմերուն՝ խուսափելու իրավիճակը վատթարացնող գործողութիւններէ եւ ընդգծեց, որ ծագող բոլոր հարցերը պէտք է լուծել բացառապէս խաղաղ քաղաքական-դիւանագիտական ճամբով, Մոսկուայի պատրաստակամութիւնը յայտնելով աջակցելու նման ջանքերու, յատկապէս՝ լարուածութեան մեղմացման եւ սահմանազատման ու սահմանագծման ուղղութեամբ:
«Այդ ջանքերը տարածաշրջանին մէջ փոխադրական կապերու ապաշրջափակման, ինչպէս նաեւ միջհամայնքային երկխօսութեան խթանման հետ պիտի նպաստեն Հարաւային Կովկասը կայունութեան, ապահովութեան եւ բարգաւաճման գօտի դարձնելուն՝ Ռուսիոյ, Ատրպէյճանի եւ Հայաստանի ղեկավարներուն 9 Նոյեմբեր 2020ի եւ ընթացիկ տարուան 11 Յունուարի յայտարարութիւններուն համաձայն», եզրափակեց Պիքանթով:
asbarez.am/պաշտպանութեան-նախարարը-հրամայեց-ոչն/
