Հայ-Թուրք Յարաբերութիւններու Հաստատման Գործընթացի Պարագային Հայկական Կողմը Պէտք Է Ունենայ Գործընթացէն Դուրս Գալու Ռազմավարութիւն

Հայ-Թուրք Յարաբերութիւններու Հաստատման Գործընթացի Պարագային Հայկական Կողմը Պէտք Է Ունենայ Գործընթացէն Դուրս Գալու Ռազմավարութիւն

30 ՍԵՊՏԵՄԲԵՐ 2021 –

«Ազդակ»-ի առցանց 36-րդ լսարանին նիւթն էր «Թուրքիոյ հետ յարաբերութիւններու կայացման խնդիրները. դասեր անցեալէն». դասախօսը` միջազգայնագէտ, թուրքագէտ դոկտ. Վահրամ Տէր Մաթեւոսեան: Լսարանը վարեց «Ազդակ»-ի ելեկտրոնային բաժինի աշխատակից Մինաս Հանս Քէհեան:

Դասախօսը իր զեկուցումը բաժնեց երեք մասի. առաջին` յետնոյեմբերեան ժամանակահատուածին Թուրքիոյ արձանագրած հռետորաբանական փոփոխութիւնը: Երկրորդ` նախորդող ժամանակահատուածին արձանագրուած բացթողումները եւ անոնցմէ քաղելիք դասերը, եւ երրորդ` ներկայ պայմանները նկատի ունենալով ի՞նչ քայլերու կարելի է ձեռնարկել:

Ապա դոկտ. Տէր Մաթեւոսեան խօսեցաւ Էրտողանի առաջադրած կովկասեան կայունութեան փլաթֆորմին, որ վերափոխուած է վեցեակի հարթակ ձեւակերպումին: Այժմ Անգարան կը փորձէ հարաւային Կովկասի մէջ աշխարհաքաղաքական ճարտարապետութեան մէջ առաջին ջութակի դերը վերցնել:

Այնուհետեւ դասախօսը ներկայացուց Անգարայի կողմէ վերափոխուած նախապայմանները` Թուրքիոյ տարածքային ամբողջականութեան ճանաչում կամ Կարսի պայմանագիրի վերահաստատում, Երեւանի կողմէ Ցեղասպանութեան միջազգային ճանաչման պահանջէ հրաժարում, Ազրպէյճանի հետ տարածքային ամբողջականութիւններու փոխադարձ ճանաչում` սահմանազատման եւ սահմանագծման գործընթացներով, ինչպէս նաեւ Սահմանադրութեան վերանայում` Ցեղասպանութեան ճանաչման բաժինը Անկախութեան հռչակագիրէն դուրս հանելու առումով:

Այնուհետեւ դասախօսը խօսեցաւ բանակցութիւններու հայկական կողմին ծուղակ չներքաշուելու անհրաժեշտութեան մասին` շեշտելով դիւանագիտական պաշարները վերապատրաստելու հրամայականը:

Խօսելով ֆութպոլային դիւանագիտութեան շրջագիծին մէջ ցիւրիխեան արձանագրութիւններու շրջանին արձանագրուած որոշ բացթողումներուն մասին` դոկտ. Տէր Մաթեւոսեան կեդրոնացաւ վեց կէտերու վրայ.

Ա.- Յարաբերութիւններու կարգաւորումը պէտք է անջատել հաշտեցման գործընթացէն,

Բ.- Աշխատիլ միջազգային կազմակերպութիւններու եւ միջնորդական առաքելութիւններու հետ,

Գ.- Թուրքիոյ մէջ հանրային կարծիքին հասանելի դառնալ,

Դ.- Հայոց ցեղասպանութեան ճշմարտացիութեան բանավէճերու ծուղակներուն չներքաշուիլ,

Ե.- Բանակցային արհեստավարժ խումբ պատրաստել,

Զ.- Մշակել գործընթացէն դուրս գալու ռազմավարութիւն:

Դասախօսութեան հետեւեցաւ լսարանականներու մասնակցութեամբ քննարկում:

www.aztagdaily.com/archives/524312