Նշելով, Որ Պատերազմի Առաջին Օրէն Իրենց Նպատակը Շուշին Գրաւելն Էր. Ալիեւ. «Ղարաբաղի Նոր Ժամանակաշրջանը Կը Սկսի»
11 ՀՈԿՏԵՄԲԵՐ 2021 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ: <Դ Ի Մ Ո Ւ Մ ՄԱԿ-ին — Հայաստան պետության եւ Ադրբեջանի Հանրապետության միջեւ սահմանի (սահմանազատման) վերաբերյալ>
«Այսօր Հատրութի բնակավայրի ազատագրման առաջին ամեակն է: Այս առիթով ամբողջ սրտով կը շնորհաւորեմ ձեզ եւ Ազրպէյճանի ամբողջ ժողովուրդը: Կը կարծեմ, որ այս օրը այստեղ` Հատրութի մէջ նշելը շատ իւրայատուկ դէպք է: Երկար դադարէ ետք, վերադարձած ենք Հատրութ-Խոջաւանթ: Կռիւով, արիւն թափելով եւ նահատակներ տալով վերադարձանք: Ալլահը մեր նահատակներու հոգիներուն խաղաղութիւն պարգեւէ: Անոնց արեան, կեանքերուն, քաջութեան գնով եւ մեր զինուորներու հերոսութեամբ է, որ պատմական արդարութիւնը վերականգնած ենք, ներխուժողները վտարած մեր բնօրրաններէն եւ վերադարձած մեր բնօրրանները», 9 հոկտեմբերին Խոջաւանթի մէջ հասարակութեան հետ հանդիպումի ընթացքին յայտնած է Ազրպէյճանի նախագահ Իլհամ Ալիեւ:
«Ազրպէյճան24» կայքը կը հաղորդէ, որ ան նշած է, թէ Հատրութի եւ Ղարաբաղի մէջ ընդհանրապէս նոր ժամանակաշրջան մը կը սկսի:
«Հատրութի գործողութիւնը ղարաբաղեան Բ. պատերազմի ամէնէն կարեւոր գործողութիւններէն մէկն է: Այս գործողութիւնը մեծ կարեւորութիւն ունի, թէ՛ զինուորական, թէ՛ ալ ռազմավարական տեսանկիւնէ: Այս գործողութեան յաջող աւարտը մեզի առիթ ընծայեց իրագործելու Ղարաբաղը ազատագրելու մեր նպատակը: Այս շրջանին մէջ Հատրութի դիրքը ռազմավարական առումով իւրայատուկ կարեւորութիւն ունի, որովհետեւ լեռնային շրջան մըն է», ըսած է Ալիեւ:
Ազրպէյճանի նախագահը յայտնած է, թէ պատերազմի աւարտէն ետք խափանարարներու յատուկ խումբ մը Հայաստանի Շիրակ շրջանէն ուղարկուած է Հատրութի շրջանի կարգ մը գիւղեր:
«Նոյեմբերի վերջաւորութեան անոնք անցան Լաչինի միջանցքը եւ մուտք գործեցին այս շրջաններ: Ինչպէս գիտէք, անոնք զինաթափուեցան եւ ձերբակալուեցան: Անոնք, որոնք ոճիրներ չգործեցին, վերադարձուեցան, իսկ անոնք, որոնք ոճիրներ գործեցին եւ խափանարարները դատարանին մէջ հաշուետուութեան ենթարկուեցան: Ըսածս այն է, որ պատերազմի աւարտէն շուրջ 20 օր երկու շաբաթ ետք, երբ Հայաստան ստորագրած էր անձնատուութեան հռչակագիրը, անոնք դարձեալ փորձեցին Հատրութի վրայ յարձակում գործել: Սակայն ազրպէյճանական զինեալ ուժերը պէտք եղած քայլերը որդեգրեցին», ըսած է ան:
«Հատրութ եւ Մարտունի շրջանները, որոնք ատենօք մաս կը կազմէին նախկին Լեռնային Ղարաբաղի Ինքնավար մարզին, իրարու միացնելով ստեղծած ենք Խոջաւանթ շրջանը: Նաեւ պէտք է յայտնեմ, որ նախկին Մարտունի շրջանի շուրջ 55-60 առ հարիւրը ազատագրուած է բռնագրաւողներէն, եւ ազրպէյճանցի քաղաքացիները այդ շրջաններ պիտի վերադառնան:
«Քանի՞ տարի կարելի է սպասել: Մինսքի խմբակը այսքան տարի եկաւ ու գնաց, առաջարկներ ներկայացուցին, հայերը չընդունեցին: Անկեղծօրէն, բազմաթիւ տարիներ համբերեցինք: Անոնց չէի կրնար ըսել: Նոյնիսկ պատերազմի ընթացքին, երբ բազմաթիւ հարցազրոյցներ կատարեցի, չէի կրնար մեր ծրագիրներուն մասին ամբողջական կերպով խօսիլ, որովհետեւ զինուորական գաղտնիք էին: Մեր գլխաւոր նպատակը ամբողջական յաղթանակ արձանագրելն ու Շուշիի մէջ մեր դրօշը բարձրացնելն էր: Այժմ կրնամ ըսել, որ այդ նպատակը պատերազմի առաջին օրէն իսկ ճշդուած էր, եւ այդ նպատակը իրագործեցինք», յայտնեց Ազրպէյճանի նախագահը` աւելցնելով. «Ազրպէյճանի ժողովուրդը յաւիտեանս պիտի ապրի ազատագրուած հողերուն վրայ»:
www.aztagdaily.com/archives/525396
