«Ուքրանիոյ Մօտ Ռուսական Ուժերու Նոր Կուտակում Մը Կը Մտահոգէ Ամերիկան Ու Եւրոպան» Կը Գրէ «Ուաշինկթըն Փոսթ»
01 ՆՈՅԵՄԲԵՐ 2021 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Ուքրանիոյ սահմաններուն մօտ ռուսական ուժերու նոր կուտակում մը մտահոգած է Միացեալ Նահանգներու եւ Եւրոպայի մէջ պաշտօնատարներ, որոնք կը հետեւին Ռուսիոյ արեւմտեան շրջանին մէջ, իրենց պնդումով, սպառազինութեան եւ զինուորներու ոչ կանոնաւոր շարժումներուն:
Պաշտօնատարներ «Ուաշինկթըն Փոսթ» օրաթերթին յայտնած են, որ ռուսական ուժերու շարժումները վերականգնած են այն մտավախութիւնները, որոնք յառաջացած էին անցեալ ապրիլին, երբ ուքրանական սահմաններուն մէջ տարիներէ ի վեր ռուսական ուժերու մեծագոյն կուտակումը միջազգային բողոքի ալիք բարձրացուցած էր:
Ուժերու կուտակում տեղի կ՛ունենայ այնպիսի պահու մը, երբ Քրեմլին Ուքրանիոյ նկատմամբ աւելի կարծր կեցուածք որդեգրած է: Ռուսիոյ նախագահ Վլատիմիր Փութին զգուշացուցած էր, որ ուքրանական հողերուն վրայ ՕԹԱՆ-ի ենթակառոյցներու որեւէ ընդլայնում Մոսկուայի համար «կարմիր գիծ» է:
«Ուաշինկթըն Փոսթ» կը նշէ, թէ յստակ չէ, թէ ռուսական ուժերը ուքրանական սահմանին մօտ ի՛նչ կ՛ընեն: Ընկերային ցանցերու վրայ վերջերս հրապարակուած տեսերիզներ ցոյց տուին ռուսական զինուորական գնացքներ եւ շարասիւններ, որոնք մեծաքանակ սպառազինութիւն, ներառեալ հրասայլեր ու հրթիռներ կը տեղափոխեն Ռուսիոյ հարաւ եւ արեւմուտք:
Վըրճինիայի մէջ գտնուող ոչ շահաւէտ «Սի.Էն.Էյ.» վերլուծական խմբաւորման մէջ ռուսական ուսումնասիրութիւններու ծրագիրի տնօրէն Մայքըլ Քոֆմըն օրաթերթին յայտնած է. «Ռազմափորձ չէ: Ինչպէս նաեւ չի թուիր մարզում ըլլալ: Բան մը կը պատահի»:
Միացեալ Նահանգներու եւ Եւրոպայի մէջ պաշտօնատարները այդ շարժումները սկսած են նկատել վերջին շաբաթներուն, երբ Ռուսիան սեպտեմբերի կիսուն աւարտած է Պիելոռուսիոյ հետ «Զապատ 2021» կոչուող ռազմափորձը:
www.aztagdaily.com/archives/527631
