Իրաքի Վարչապետին Դէմ Ականուած Անօդաչու Թռչող Սարքով Մահափորձ

Իրաքի Վարչապետին Դէմ Ականուած Անօդաչու Թռչող Սարքով Մահափորձ

08 ՆՈՅԵՄԲԵՐ 2021 – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Իրաքի մայրաքաղաք Պաղտատի ապահովական «Կանաչ շրջան»-ին մէջ Իրաքի վարչապետ Մուսթաֆա Քազիմիի տան վրայ ականուած անօդաչու թռչող սարքով յարձակում տեղի ունեցաւ: Մահափորձին պատճառով անոր թիկնապահներէն վեցը վիրաւորուեցան, սակայն վարչապետը չվնասուեցաւ:

Քազիմի բոլորին կոչ ուղղեց հանդարտ մնալու եւ ինքնազսպումի դիմելու:

Վերջերս կատարուած խորհրդարանական ընտրութիւններուն արդիւնքին պատճառով արձանագրուող անկարգութիններու պայմաններուն մէջ տեղի ունեցած մահափորձը դատապարտուեցաւ Միացեալ Նահանգներու, Իրանի եւ արաբական երկիրներուն կողմէ:

«Պի.Պի.Սի.» կը հաղորդէ, որ ըստ ապահովական աղբիւրներուն, Տիգրիս գետին վրայ գտնուող Հանրապետութեան կամուրջին մօտէն շղթայազերծուած յարձակումին ընթացքին օգտագործուած են երեք անօդաչու թռչող սարքեր, որոնցմէ երկուքը կարելի եղած է վնասազերծել:

Յարձակումին պատասխանատուութիւնը ոչ ոք ստանձնեց:

aztagdaily.com/archives/528423