Եւրոպական Միութիւնը Հայաստանին Ու Ազրպէյճանին Կոչ Կ՛ուղղէ Վերսկսելու Չլուծուած Հարցերու Համապարփակ Լուծման Համար Բանակցութիւնները
18 ՆՈՅԵՄԲԵՐ 2021 – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Եւրոպական Միութիւնը մտահոգութիւն յայտնած է Հայաստան-Ազրպէյճան սահմանին վրայ կացութեան լարուածութեան նկատմամբ եւ կողմերուն կոչ ուղղած է` վերսկսելու չլուծուած հարցերու համապարփակ լուծման համար բանակցութիւններուն: «ՌԻԱ Նովոսթի» լրատու գործակալութեան համաձայն, այս մասին կը նշուի միութեան արտաքին քաղաքականութեան ծառայութեան յայտարարութեան մէջ:
«Կողմերուն կոչ կ՛ուղղենք` վերսկսելու բանակցութիւններուն չլուծուած խնդիրներու համապարփակ լուծման հասնելու համար, ներառեալ` սահմանազատման հարցին մէջ», կը նշուի հաղորդագրութեան մէջ:
Եւրոպական Միութիւնը ընդգծած է նաեւ իր յանձնառութիւնը «լարուածութեան յաղթահարման համար Հայաստանի եւ Ազրպէյճանի հետ աշխատելուն» եւ աջակցութիւն յայտնած ԵԱՀԿ-ի Մինսքի խմբակի` 15 նոյեմբերի յայտարարութեան:
«Կողմերուն կոչ կ՛ուղղենք առաւելագոյն զսպուածութիւն դրսեւորելու, ետ քաշելու զինուորական ուժերը եւ կատարելու իրենց ստանձնած պարտականութիւնները», կ՛ընդգծուի Եւրոպական Միութեան յայտարարութեան մէջ:
www.aztagdaily.com/archives/529549
