Տիգրանակերտի Հայ Կաթողիկէ Եկեղեցին Վերանորոգուելէ Ետք Յանձնուած է Տեղի Համալսարանի Տնօրինութեան
06 ԴԵԿՏԵՄԲԵՐ 2021 – ԱՐԵՒՄՏԵԱՆ ՀԱՅԱՍՏԱՆ:
Տիարպեքիրի Սուրբ Յովսէփ հայ Կաթողիկէ եկեղեցին պետութեան կողմէ վերանորոգուելէ ետք՝ 10 տարիով յանձնուած է Տիարպեքիրի «Տիճլէ» համասարանի տնօրինման: Այս մասին կը հաղորդէ Ermenihaber.am-ը՝ վկայակոչելով rudaw.net-ը։
Տիարպեքիրի Սուր կեդրոնական շրջանին մէջ տեղակայուած եկեղեցին լրջօրէն վնասուած էր 2015-ին այդտեղ թրքական ուժայիններու եւ «Քիւրտստանի բանւորական կուսակցութիւն» (PKK-ՔԲԿ) ռազմաքաղաքական կազմակերպութեան զինեալներուն միջեւ տեղի ունեցած բախումներուն ընթացքին:
Թուրքիոյ Հիմնադրամներու գլխաւոր վարչութեան կողմէ վերանորոգուած հայ կաթողիկէ համայնքին պատկանող եկեղեցին Տիճլէի համալսարանին կողմէ 10 տարի պիտի օգտագործուի կրթական եւ մշակութային նպատակներով: Ատով յանդերձ պահպանուած է նաեւ հայ կաթողիկէ համայնքի՝ եկեղեցւոյ մէջ պատարագներ իրականացնելու իրաւունքը:
Թուրքիոյ Հայ Կաթողիկէ եկեղեցւոյ թեմի առաջնորդ Լեւոն արքեպիսկոպոս Զէքիյեան վերանորոգումէն ետք օրհնած է եկեղեցին ու այնտեղ երկարատեւ ընդմիջումէ ետք իրականացուցած առաջին պատարագը:
Զէքիյեան գոհունակութիւն յայտնած է, որ 100 տարի անց համայնքին իրաւունք ընձեռուած է պատարագ կազմակերպելու:
Նշենք, որ 2013թ. եւս Սուրի հայկական եկեղեցին վերանորոգուած էր, որմէ ետք կ՝օգտագործուէր իբրեւ գորգերու արհեստանոց:
yerakouyn.com/2021/12/06/տիարպեքիրի-հայ-կաթոլիկ-եկեղեցին-վերա/
