ՀՅԴ Եւրոպայի Հայ Դատի Գրասենեակի Յայտարարութիւնը Եւրոպական Խորհուրդի Նախագահ Շարլ Միշելի, Փաշինեանի Եւ Ալիեւի Հանդիպումին Ընդառաջ

ՀՅԴ Եւրոպայի Հայ Դատի Գրասենեակի Յայտարարութիւնը Եւրոպական Խորհուրդի Նախագահ Շարլ Միշելի, Փաշինեանի Եւ Ալիեւի Հանդիպումին Ընդառաջ

15 ԴԵԿՏԵՄԲԵՐ 2021 – ՀԱՅԱՍՏԱՆ – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:

Եւրոպական Միութեան Արեւելեան գործընկերութեան ընթացիկ վեհաժողովի եւ Եւրոպական խորհուրդի նախագահ Շարլ Միշելի ու Հայաստանի եւ Ազրպէյճանի առաջնորդներու հանդիպումին վերաբերեալ:

ՀՅԴ Եւրոպայի Հայ դատի գրասենեակը եւ եւրոպական երկիրներու մէջ գործող իր յանձնախումբերը, իբրեւ Եւրոպական Միութեան քաղաքացիական հասարակութեան ներկայացուցիչներ, Եւրոպական խորհուրդի նախագահին կոչ կ՛ուղղեն.

– վերահաստատելու Եւրոպական Միութեան աջակցութիւնը ԵԱՀԿ-ի Մինսքի խմբակի համանախագահներու միջնորդական ջանքերուն եւ հիմնարար սկզբունքներուն, ներառեալ Արցախի/Լեռնային Ղարաբաղի բնիկ հայ բնակչութեան ինքնորոշման իրաւունքը,

– որդեգրելու յստակ դիրքորոշում Հայաստանի Հանրապետութեան ինքնիշխանութեան նկատմամբ ազրպէյճանական շարունակուող սադրանքներու անընդունելիութեան վերաբերեալ,

– կոչ ուղղելու Ազրպէյճանի իշխանութիւններուն` անյապաղ եւ ամբողջութեամբ դուրս բերելու իրենց զինուած ուժերը Հայաստանի Հանրապետութեան տարածքէն,

– կոչ ուղղելու Ազրպէյճանի իշխանութիւններուն ձեռնամուխ ըլլալու հայկական բնակավայրերու շուրջ, այդ կարգին` Արցախի մէջ, ապառազմականացուած անվտանգութեան գօտիի ստեղծման,

– արձանագրելու, որ Հայաստանի եւ Ազրպէյճանի միջեւ սահմանազատման եւ սահմանագծման որեւէ հոլովոյթ չի կրնար պարտադրուիլ ուժի կիրարկումով, մարդու իրաւունքներու ոտնահարումով` ի հաշիւ Հայաստանի ազգային անվտանգութեան եւ

– կանխորոշելու Լեռնային Ղարաբաղի կարգավիճակը` ազրպէյճանական պահանջներու շրջագիծին մէջ,

– ճնշում գործադրելու Ազրպէյճանի իշխանութիւններուն վրայ` անյապաղ եւ անվերապահօրէն ազատ արձակելու հայ ռազմագերիները եւ պահուող անձերը,

– ընդգծելու, որ 2020-ի պատերազմի հետեւանքով ազրպէյճանական զինուած ուժերուն կողմէ վերահսկուող Լեռնային Ղարաբաղի բնակավայրերու բնիկ հայ բնակչութեան ցեղային զտումները հանդուրժելի չեն,

– փաստելու, որ Թուրքիոյ աջակցութեամբ Ազրպէյճանի բռնապետական վարչակարգին կողմէ սանձազերծուած պատերազմը, վարձկան-ահաբեկիչներու տեղակայումով, չի կրնար յանգեցնել Հայաստանի Հանրապետութեան տարածքով յատուկ կարգավիճակ ունեցող որեւէ փոխադրամիջոցի կապի սահմանումին` ի հաշիւ Հայաստանի անվտանգութեան եւ տնտեսական շահերուն,

Ազրպէյճանի իշխանութիւններուն վրայ ճնշում գործադրելու` դադրեցնելու Լեռնային Ղարաբաղի մէջ հայկական մշակութային ժառանգութեան իւրացման եւ/կամ ոչնչացման քաղաքականութիւնը,

– Ազրպէյճանի իշխանութիւններուն կոչ ուղղելու` դադրեցնելու հայատեացութեան եւ պատերազմական հռետորաբանութեան քաղաքականութիւնը:

ՀՅԴ ԵՒՐՈՊԱՅԻ ՀԱՅ ԴԱՏԻ ԳՐԱՍԵՆԵԱԿ

14 դեկտեմբեր 2021

aztagdaily.com/archives/532242