Հայաստանի Եւ Թուրքիոյ Ներկայացուցիչները Համաձայնած Են Առանց Նախապայմանի Շարունակելու Բանակցութիւնները
15 ՅՈՒՆՈՒԱՐ 2022 – ՀԱՅԱՍՏԱՆ – ԹՈՒՐՔԻԱ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Երէկ` ուրբաթ, 14 յունուար 2022-ին, Մոսկուայի մէջ տեղի ունեցաւ Հայաստան-Թուրքիա յարաբերութիւններու կարգաւորման հոլովոյթի յատուկ ներկայացուցիչներ` Հայաստանի Հանրապետութեան Ազգային ժողովի փոխնախագահ Ռուբէն Ռուբինեանի եւ Թուրքիոյ դեսպան Սերտար Քըլըճի հանդիպումը:
Հայաստանի արտաքին գործոց նախարարութիւնը կը հաղորդէ, որ կառուցողական մթնոլորտի մէջ կայացած առաջին հանդիպումի ընթացքին յատուկ ներկայացուցիչները Հայաստանի եւ Թուրքիոյ միջեւ երկխօսութեան միջոցով յարաբերութիւններու կարգաւորման հոլովոյթի վերաբերեալ իրենց նախնական միտքերը փոխանակած են:
Կողմերը համաձայնած են առանց նախապայմանի շարունակելու լիարժէք լուծման ուղղուած բանակցութիւնները:
«Արմէնփրես» կը հաղորդէ, որ Թուրքիոյ արտաքին գործոց նախարարութիւնը իր կարգին հաղորդագրութիւն մը հրապարակելով Հայաստան-Թուրքիա յարաբերութիւններու կարգաւորման հոլովոյթի յատուկ ներկայացուցիչներու առաջին հանդիպումը որակած է դրական եւ կառուցողական:
«Իրենց առաջին հանդիպումին ընթացքին, որ անցաւ դրական եւ կառուցողական մթնոլորտի մէջ, յատուկ ներկայացուցիչները նախնական միտքեր փոխանակած են Թուրքիոյ եւ Հայաստանի միջեւ երկխօսութեան միջոցով իրականացուելիք կարգաւորման հոլովոյթին վերաբերեալ: Կողմերը համաձայնած են շարունակել լիարժէք կարգաւորման նպատակով բանակցութիւնները` առանց նախապայմանի», նշուած է Թուրքիոյ արտաքին գործոց նախարարութեան յայտարարութեան մէջ:
«Յատուկ ներկայացուցիչներու երկրորդ հանդիպման վայրն ու ժամկէտը պիտի որոշուի աւելի ուշ` դիւանագիտական խողովակներով», նշուած է հաղորդագրութեան մէջ:
ԹԱՍՍ լրատու գործակալութիւնը կը հաղորդէ, որ Ռուսիոյ արտաքին գործոց նախարարութիւնը հանդիպումին վերաբերեալ իր հրապարակած հաղորդագրութեան մէջ ըսած է. «Կողմերը դրսեւորած են իրենց պատրաստակամութիւնը երկխօսութեան մէջ մտնելու կառուցողական, ոչ քաղաքականացուած ձեւով, բաց ոգիով եւ կեդրոնանալով գործնական արդիւնքներու վրայ` «փոքր քայլերով» դիւրինէն շարժելով դէպի բարդը: Համաձայնութիւն ձեռք բերուած է շարունակելու որոնումները հասարակաց կէտերու, որոնք պիտի աշխատին ի շահ երկու երկիրներու ժողովուրդներու` ի շահ տարածաշրջանի կայունութեան եւ տնտեսական բարգաւաճման»:
«Արմէնփրես» կը հաղորդէ, որ Եւրոպական Միութեան արտաքին յարաբերութիւններու ծառայութեան բանբեր Փեթեր Սթանօ Հայաստան-Թուրքիա յարաբերութիւններու կարգաւորման բանակցութիւններու առաջին հանդիպումին վերաբերեալ յայտարարութիւն տարածելով յայտնած է. «Այս ուրբաթ յատուկ բանագնացներու առաջին հանդիպումը կարեւոր քայլ էր դէպի առաջ, եւ Եւրոպական Միութիւնը Թուրքիոյ եւ Հայաստանին կոչ կ՛ուղղէ` այդ ուղղութեամբ հետագայ ջանքեր գործադրելու:
«Յարաբերութիւններու կարգաւորման ուղղութեամբ հետագայ որեւէ շօշափելի քայլ լաւ նորութիւն պիտի ըլլար շրջանային կայունութեան եւ հաշտեցման ու տնտեսական զարգացման հեռանկարներու համար», նշած է Սթանօ:
Արտաքին յարաբերութիւններու ծառայութեան բանբերը ընդգծած է, որ Հայաստանի եւ Թուրքիոյ միջեւ յարաբերութիւններու կարգաւորումը առանցքային նշանակութիւն ունի Եւրոպական Միութեան համար երկու երկիրներուն հետ անոր փոխադարձ գործակցութեան առումով:
«2014 թուականէն ի վեր Եւրոպական Միութիւնը աւելի քան 4,5 միլիոն եւրօ յատկացուցած է այն նախագիծերուն համար, որոնք ուղղուած են հող նախապատրաստելու յարաբերութիւններու կարգաւորման համար շարք մը ոլորտներու մէջ, ինչպիսիք են տնտեսութիւնը, մշակոյթը, կրթութիւնը եւ տեղեկատուութեան փոխանակումը: Եւրոպական Միութիւնը պատրաստ է ցուցաբերելու հետագայ աջակցութիւն, հաւանական է լրացուցիչ քայլերու ձեռնարկել յարաբերութիւններու կարգաւորման ուղղութեամբ», եզրափակած է Սթանօ:
aztagdaily.com/archives/534749
