Մասուտ Պարզանի
25 ՅՈՒՆՈՒԱՐ 2016
Հիւսիսային Իրաքի քրտական ինքնավար մարզի նախագահ Մասուտ Պարզանի բրիտանական «Տը Կարտիըն» օրաթերթին հետ հարցազրոյցի մը ընթացքին յայտնեց, որ «Սայքս-Փիքօ»-ի համաձայնութիւնը ձախողեցաւ, եւ Միջին Արեւելքը այլեւս պէտք ունի քրտական պետութեան ստեղծման ճամբան հարթող նոր համաձայնութեան մը:
Ան այն համոզումը յայտնեց, որ` «աշխարհի ղեկավարները իրենց սրտին խորքը գիտակցեցան, որ «Սայքս-Փիքօ»-ի ժամանակաշրջանը վերջ գտաւ, այդ մէկը ըսի՞ն, թէ՞ ոչ, ընդունեցի՞ն, թէ՞ ոչ, իրողական գետնի վրայ այդ է իրականութիւնը»:
Ան նշեց, որ ներկայ կացութեան պահպանումը շրջանի յաւելեալ քայքայման ու քանդումին պիտի առաջնորդէ` աւելցնելով, որ հարիւր տարիէ ի վեր կատարուած սխալ փորձը, որ որեւէ տեղ չառաջնորդեց, կրկնելը կամ ատոր վրայ պնդելը անտրամաբանական է:
«Իրաքը այսօր մասնատուած է, եւ մենք ատոր պատասխանատուն չենք: Մենք մեր կարելին ըրինք զայն միացեալ պահելու, սակայն Իրաքի մէջ գոյութիւն ունեցող մշակոյթը համակեցութեան մշակոյթը չէ», յայտարարեց Պարզանի` աւելցնելով. «Եթէ չկրցանք միասին ապրիլ, պէտք է այլընտրանքներու հետ ապրիլ»:
Քիւրտ ղեկավարը նշեց, որ Քրտական ինքնավար մարզը իր դրացիներէն որեւէ մէկուն սպառնալիք մը չի ներկայացներ եւ հերքեց, թէ թուրքերուն հետ քննարկած է քրտական պետութեան ստեղծումը անոնց կողմէ ընդունելու կամ մերժելու հարցը, սակայն այն կարծիքը յայտնեց, որ անոնք «այդ հարցին պիտի չընդդիմանան»:
«Ատիկա մեր ազգային իրաւունքն է: Մենք ոչ ոքի սպառնալիք կը ներկայացնենք, սակայն մեր իրաւունքներուն կիրարկման համար ոեւէ մէկուն արտօնութեան կարիքը չունինք», յայտարարեց Պարզանի:
ԱԶԴԱԿ
http://www.aztagdaily.com
