Կիրօ Մանոյեան
26 ՅՈՒՆՈՒԱՐ 2016
ՀՅԴ Բիւրոյի անդամ, Հայ դատի եւ քաղաքական հարցերու գրասենեակի պատասխանատու Կիրօ Մանոյեան «Թերթ»-ին հետ ունեցած զրոյցին ընթացքին` անդրադառնալով Լեռնային Ղարաբաղի տագնապին, ըսած է, որ հայկական կողմը պէտք է անընդհատ ցոյց տայ, որ Ազրպէյճանն է այսօրուան վիճակին պատասխանատուն, միաժամանակ պահանջէ միջազգային ընտանիքէն` աւելի կտրուկ ըլլալ Ազրպէյճանի նկատմամբ:
«Այսօր Ազրպէյճանի զինուորական, ռազմաքաղաքական եւ տնտեսական նշանակութիւնը աւելի արժեզրկուած է: Ազրպէյճան ինքզինք կ՛օգնէ վարկաբեկուելու, մանաւանդ` ներքին ժողովրդավարութեան եւ այլ հարցերով, կը մնայ մենք ալ Ղարաբաղի հարցով աւելի աշխուժ ըլլանք եւ այլընտրանքներ ներկայացնենք միջազգային հանրութեան», ըսած է ան:
Ան նկատել տուած է, որ կարելի է ըսել, թէ որոշ չափով փոխուած է Մինսքի համանախագահող պետութիւններուն կեցուածքը եւ իրենց վերջին յայտարարութիւններուն մէջ կան Ազրպէյճանի վերաբերող որոշ ակնարկներ: «Պէտք է հասկնանք, որ Մինսքի համանախագահողները դատաւորներ չեն, այլ միջնորդներ են, այդ պատճառով պէտք է, որ կարենան բոլորին հետ խօսիլ: Անոնք զգուշ են, սակայն ատիկա չի նշանակեր, որ պէտք է շարունակեն այն կեցուածքը, որ կրնայ խրախուսել Ազրպէյճանը` շարունակելու այս վարքագիծը: Միջազգային համայնքը` յանձինս Մինսքի խմբակի համանախագահող պետութիւններուն, պէտք է, որ Ազրպէյճանին հասկցնէ, որ նաեւ այլ լուծումներ կան», նշած է Մանոյեան:
Պատասխանելով այն հարցումին, թէ, ըստ իրեն, ինքնին միջազգային հանրութեան, յատկապէս Մինսքի խմբակի համանախագահ պետութիւններու ոչ համարժէք արձագանգին պատճառո՞վ է, որ Ազրպէյճանը ե՛ւ բանակցային հոլովոյթին, ե՛ւ սահմանին վրայ նման վարքագիծ կը դրսեւորէ` Կիրօ Մանոյեան ըսած է. «Ըսել, թէ պատճառն է, կը կարծեմ, որ շատ մեղադրած կ՛ըլլանք, սակայն այն, որ իրենք ունին իրենց մեղքի բաժինը, մեղսակից են, ատիկա կը կարծեմ` փաստ է, որ իրենց պահուածքով կը խրախուսեն Ազրպէյճանին շարունակելու նոյն անլուրջ եւ խափանարար գործելաոճը»:
Կիրօ Մանոյեան անդրադարձած է նաեւ Ազրպէյճանի նախագահ Ալիեւի կողմէ կատարուած այն յայտարարութեան , թէ Ազրպէյճանի եւ Հայաստանի նախագահներուն հանդիպումը ձեւական բնոյթ կը կրէ: «Ատիկա անպատկառութիւն է, կը նշանակէ, որ ան լուրջ չի վերաբերիր այս հարցին նկատմամբ: Այդ պատճառով ալ անհրաժեշտ է, որ միջազգային համայնքը հասկցնէ Ալիեւին, որ կարելի չէ այսքան կամայական ըլլալ եւ եթէ այս պահուածքը երկար պիտի շարունակուի, ապա միջազգային համայնքը պիտի ճանչնայ Լեռնային Ղարաբաղի Հանրապետութեան անկախութիւնը», ըսած է ան եւ հիմք ընդունելով Ալիեւի այդ յայտարարութիւնը` աւելցուցած է, որ յառաջընթացի յոյս չի տեսներ: «Եթէ որեւէ յոյսի նշոյլ ոեւէ մէկուն մօտ կար, կը կարծեմ, որ արդէն պէտք է հիասթափուի», աւելցուցած է Կիրօ Մանոյեան:
ԱԶԴԱԿ
http://www.aztagdaily.com
