Չինաստանը Նոյնպէս Դէմ Է ՕԹԱՆ-ի Ընդլայնման
09 ՓԵՏՐՈՒԱՐ 2022 – ՀԱՅԱՍՏԱՆ – ԱՇԽԱՐՀ – ՄԻՋԱԶԳԱՅԻՆ ՔԱՂԱՔԱԿԱՆՈՒԹԻՒՆ:
Չինաստանը դէմ է ՕԹԱՆ-ի ընդլայնման եւ անօգուտ կը նկատէ զայն իբրեւ համաշխարհային անվտանգութեան ապահովման ուղղուած համապատասխան ջանք: ԹԱՍՍ լրատու գործակալութիւնը կը հաղորդէ, որ այս մասին իր հրապարակած յայտարարութեան մէջ յայտնեց Եւրոպական Միութեան մէջ Չինաստանի ներկայացուցչութիւնը:
«ՕԹԱՆ-ի ընդլայնումը պիտի չօգնէ աշխարհի վրայ անվտանգութիւնն ու կայունութիւնը ապահովելու», նշուած է յայտարարութեան մէջ:
Փաստաթուղթին մէջ կը նշուի, որ դաշինքի նման փորձերը «միայն կը նպաստեն քաղաքական դաշինքներու ձեւաւորման եւ զինուորական ոլորտին մէջ ճակատումի յառաջացման»:
«Մենք ՕԹԱՆ-ին կոչ կ՛ուղղենք` հրաժարելու Պաղ պատերազմի մտածելակերպէն եւ գաղափարախօսութենէն, յարգանք ցուցաբերելու այլ երկիրներու գերիշխանութեան, անվտանգութեան ու շահերու, անոնց քաղաքակրթութիւններու, պատմութեան եւ մշակոյթներու տարբերութիւններուն նկատմամբ», կ՛ընդգծուի յայտարարութեան մէջ:
«ՕԹԱՆ-ը Պաղ պատերազմի արդիւնք է: Չինական կողմը կը կարծէ, որ շրջանային անվտանգութիւնը չի կրնար ապահովուիլ զինուորական դաշինքներու բռնի ընդլայնումով», կը շեշտուի փաստաթուղթին մէջ:
Յայտարարութեան համաձայն, Հիւսիսատլանտեան դաշինքը «պէտք է աւելի շատ ջանքեր գործադրէ միջպետական վստահութիւնը ամրապնդելու` շրջանային խաղաղութիւնն ու կայունութիւնը իսկապէս պաշտպանելու համար»:
www.aztagdaily.com/archives/537731
